Nongstoiñ, Naiwieng 26: U bah Sranly Rongrin secretary jong ka National Peoples Party Mawshynrut constituency mynta ka sngi hatmajai ka 26 tarik Naiwieng, u la phah da ka shithi iehnoh kam sha u President jong ka party.
U bah Rongrin haba ïakren bad ki nongthoh khubor hadien ba u la dep phah ïa ka shithi iehnoh kam, u la ong ba ka jingmih noh jong u na ka party kam dei na kano kano ka daw hynrei ka dei na ki daw shimet jong u.
Haba kylli pat la u don jingthmu ne em ban leit pynïasoh bad kano kano ka seng saiñ pyrthei, u la ong ba ïa mynta um pat lah ban ong ei ei hynrei ka por hi kan sa batai.
Ha kajuh ka por u la ong ba kumba u la long u nongïalam jong ki sengbhalang la bun bun snem, um sngew lah ban shu shong kli kti haba u ïohi ïa ka jingeh jong ki paitbah ka thaiñ.
Kumta lada ka lad ka plie u don ka jingthmu ban mih madan ban ia shim bynta ha ka kam saiñ pyrthei kum u kyrtong la ka long na kano kano ka seng ruh tangba u hap ban ap ïa ka jingai jingmut jong ki paitbah ba bun ba lang.
