Pynsangeh noh ïa ka jingthmu wanrah karkhana ha Byrnihat, ai jingmut u MLA ban rah sha Hima Jirang

Nongpoh, Naiwieng 25: Tang hadien ka jingïakhih ba la mih na ki paidbah nongshong shnong jong 3 tylli ki shnong ha ka thaiñ 12 mer ba kynthup ïa ka shnong Umpher, Amphanggre, Matchokgre ryngkat ki kynhun sengbhalang bapher bapher, u MLA ka Jirang u Bah Sosthenes Sohtun mynta ka sngi u la mih shakhmat ban ai ka jingkyrshan ïa kitei ki Shnong kiba la leit ruh ban ïakynduh kyrpang bad u ban pynpaw ka jingpyrshah halor katei ka jingthmu jong ka sorkar ban wanrah Industrial Estate ha ka jaka jong ka Soil and Water Conservation ha 12 mer, Umpher ha ka thaiñ Byrnihat.
Haba kren sha ki lad pathai khubor mynta ka janmiet u MLA u la pynpaw ba katei ka jingpyrshah kadei kaba don jingmut bad kum u MLA u la dep ruh ban ai da ka jingthoh sha u Myntri Rangbah ba kum ka sorkar ka dei ban peit bñiah shuwa, ban pynshai bha halor katei ka jingthmu namar kum u nongmihkhmat u don ka jingsngewkhia kaba jur halor ka jingjakhlia jong ka thaiñ Byrnihat bad kaba la ïoh bat ruh kum kawei na ki jaka ba jakhlia tam ha ka ri.
U la ong ruh halor katei ka jingthmu jong ka sorkar dei ban pynsnageh noh shuwa, namar lada dang wan shuh shuh ki karkhana kala nang pynjakhlia shuh shuh bad kum u MLA un sa buddien ruh kiwei ki jait karkhana ba ka sorkar ka thmu ban wanrah bad kitei ki units kim dei ban ktah ïa ka mariang.
Shuh shuh u la ïoh ruh ban ïakren bad u Myntri Rangbah ba dei ban pynkynriah noh ïa katei ka Industrial Estate sha kawei pat ka jaka ha ka thaiñ Jirang ha kaba u la ïoh ruh ban ïakren bad ki bor Hima jong ka Jirang kiba la pynpaw ba ki kloi ban pdiang lada kitei ki karkhana kim don jingktah ïa ki paidbah, bad u MLA u la pynpaw ruh ba nalor ka roi ka par ba ka sorkar ka don ka jingthmu ban kyntiew ïa ka ïoh ka kot ka jylla kam dei pat ban klet ïa ka koit ka khiah jong ki paidbah.