Yn pynlong ki Public Sector Bank ïa ka Credit Outreach ha ka ri bad ha Meghalaya da ki prokram ha baroh ki District

Shillong, Jylliew : Ki Public Sector Bank kin pynlong ïa ka prokram ka ba heh bha kum shi bynta ka Azadi Ka Amrit Mahotsav (AKAM) mynta ka sngi. . Baroh ki distrik ha ka ri ki la kloi ban pdiang ïa ki briew kiba don jingkylli shaphang ki lad ïoh shim ram bad ka jingrung kyrteng hapoh ki skhim bapher bapher jong ka Sorkar. Kine ki prokram ban pynlong ha ki distrik ki dei ba pynïaid da baroh ki Public Sector Bank bad ki State Level Bankers Committee (SLBC).
Da kaba kynmaw ïa ka Credit Outreach Programme ha kylleng ka ri, ka Meghalaya ruh kan pynlong ïa kane ha baroh ki distrik ban ai jingtip ïa ki briew shaphang ki lad ïoh shim ram bad ka jingpynrung kyrteng hapoh ki skhim Sorkar bapher bapher.
Kine ki prokram ki dei shi bynta ka jingrakhe kaba shi taïew jong ka tnat Finance (MoF) hapoh ka AKAM naduh ka 6 tarik haduh 12 tarik Jylliew, 2022. Ha ka sngi ba nyngkong jong kane ka jingrakhe ba shi taïew, la wan ïashim bynta u Myntri Rangbahduh ka ri, ha Vigyan Bhawan, New Delhi.
Ka jingthmu jong kine ki prokram ha ki distrik ka dei ban rah ia ka jingrakhe ïa ka AKAM sha baroh ki bynta jong ka ri ha kaba ka don ka jingïashim bynta shitrhem jong ki nongtrei bad ki briew. La bthah ïa baroh ki SLBC ba kin pynlong ïa ki prokram halor ki lad ïoh shim ram, ka jingpynrung kyrteng hapoh ki skhim Jan Suraksha jong ka Pradhan Mantri Jeevan Jyoti Bima Yojana (PMJJBY), Pradahan Mantri Suraksha Bima Yojana (PMSBY) bad Atal Pension Yojana (APY), ka jingai jingtip ïa ki briew bad ka jinghikai ïa ki shaphang ki kam pisa bad ruh ban ithuh ïa ki jingtrei shitom jong ki branch, ki BC bad kiwei kiwei.