Jowai, Jylliew 07: Ka Jowai Presbytery ka la rakhe burom ïa ka sngi pynneh pynsah mariang ne ka Word Environment Day da kaba pynlong ïa ka jingai jinghikai (Training) ba shi sngi ha ka 4 tarik u Jylliew, 2022 ha ka Balang Presbyterian Demthring, West Jaiñtia Hills.
Ki nongïashim bynta kiba la wan sha kane ka training ki kynthup na ki 17 tylli ki Balang kiba hap hapoh jingpeit jingkhmih jong ka Jowai Presbytery. Ka phang jong kane ka training ka long “Kumno ban sumar ïa ka Mariang bad ki sawdong sawkun jong ka”, ïa kaba la wan ban ai jinghikai ha katei ka sngi da u ma Franky Well Blah, uba dei u Chief Forest Officer jong ka Jaiñtia Hills Autonomous District Council.
U ma Blah haba ai jinghikai ha katei ka sngi u la pynkynmaw ba ïa ka World Environment Day la buh kyrpang da ka United Nations Assembly ha u snem 1972. Ula ai jinghikai ruh shaphang ka Solid Waste Management halor kumno ban pynïakhlad ïa ki ñiut kiba pyut bad ki ñiut ki bym pyut.
Ula ban jur ïa ki nongïashim bynta ban shim ïa ka jingkitkhlieh ban pynneh pynsah ïa ka mei mariang. Ula hikai ruh shaphang ka rukom shim symbai na ki jait dieng kiba la don hapoh ri la jong bad u ong, ka kham bha ban thung ïa kine ki jait dieng ki ba la im lypa ha ki khlaw jong ngi.
U pynkynmaw ruh ‘ba haba ngi thung dieng ngi dei ban pyrkhat la ka dei ban ïoh jingmyntoi ne ban pynneh pynsah ïa ka mariang’.
Ïa ka jingïalang la pynïaid da u Rev. K. Dkhar ba dei u Chairman ka Socio Economic and Life Development Committee.
