Shillong, Naiwieng, 20: Ka Meghalaya High Court ha ka sngi baar ka la bthah ïa ka sorkar jylla ban aiti ïa ka kaiphod shimkam ha kaba ïadei bad ka jingïada ïa ka wah Myntdu kaba ha ka thaiñ Jaiñtia Hills.
Ha ka hukum ba ka la pynmih hadien ba la sngap ïa ka PIL halor kane ka kam, ka meij ki nongbishar ba kynthup ïa u chief justice Indra Prasanna Mukherji bad u Justice W Diengdoh ka la ong, “Ka Amicus Curiae ka la bthah ban aiti ïa ka kaiphod hapoh ka 28 tarik u Rymphang, 2025. Ka sorkar kadei ruh ban ai ïa ka kaiphod kaba pyni ba ka la don ka jingshimkam bad ba kadei ban jubab ïa kane ka Amicus Curiae hapoh ka 13 tarik u Lber, 2025.”
Ka Amicus Curiae P Yobin, ha ka kaiphod ba la ai lang la ïathuh ïa ka jinglong kongsan jong ka Wah Myntdu kaba tuid napoh ka thaiñ Jaiñtia bad kaba leit tuid ruh sha ka ri Bangladesh.
Kane ka wah ka ïaid lyngba artylli ki them jong ka jylla kiba kynthup ïa ka Pynthor Nein bad Pynthor Wah kaba la ai jingmyntoi ïa kumba 40,000 ngut ki nongshong shnong. Ïa kane ka wah la mane kum ka blei bad la burom ïa ka kum ka Tawiar Takan (divine angel guardian) da ki nongshong shnong.
Ka jingsngewkhia kaba la wanrah ha kane ka jingkyrpad ka long halor ka jingai jingbit jong ka sorkar ban shna ïa ki jingtei hajan jong ka wah. Kum kine ki jingtei ka la ktah bha ïa kane ka wah naba baroh ki jaboh ki la lang hapoh kane ka wah. Kaba ar ka long ba ka sorkar kam shym la lah ban pynsangeh ïa ka jingtuid ka khyndew hapoh ka wah. Kane ka la ktah ïa ka jingtuid jong ka um sha ki jaka rep, nangta ka jingdonkam ïa ka umbam umdih bad kiwei pat ki jingthmu.
Ka meij ki nongbishar ki la ong ba ki la hun ïa ka kaiphod ba la wanrah da AAG ba ka sorkar ka la shim ki sienjam ban ïada na ka jingtwa ka khyndew bad kumjuh ruh ban weng ïa ki jaboh kiba la mih na ka daw jong ki jingtei kiba la hab hapoh ka wah.
“Ka la paw ha ka kaiphod ba kane ka kam kan long kaba shim por. La kdew ruh da Amicus Curiae ba ka por tyrkhong ka la sdang bad kan sa nang long tyrkhong ha ki sngi ban wan. Kumta lah don ban shim ki sienjam kiba kyrkieh ban pynsuk ïa ka jingtuid laitluid jong ka wah. Ngi bthah ba ka sorkar ka dei ban bteng ban pyndep ïa ka kam kaba ki la sdang,” ka la ong.
Ka meij ki nongbishar ka la bthah ruh ba dei ban pynmih ïa ka hukum da ka sorkar mardor ka ban khang ïa ka jingtheh ïa ki jaboh na kine ki jingtei hapoh ka wah bad bthah ruh ba dei ban kit da ki trok ne kino kino ki kali sha ka jaka bret ñuit ba la buh da ka sorkar.
“Kaba ar ka long ba kadei ban don ka jingbthah ba ïa ki kam jingtei dei ban kiar najan jong ka wah bad kane ka dei ban long kaba ïaid da ka aiñ ha ka lynti kaba shit kaba shai bad kaba don ka jingkitkhlieh,” ong ka hukum.
