Shillong, Jylliew :Shibynta ka jingrakhe ïa ka taïew pynneh pynsah mariang ha ka jylla, na ka liang ka ophis jong ka Meghalaya Basin Management Agency (MBMA) ka la pynlong da ka prokram ai snam mon sngewbha (blood donation program) ha ka 6 tarik mynta u bnai ha ryngkat ka jingïatreilang bad ka Regional Blood Centre Pasture institute.
ïa kane ka prokram la pynlong hapoh ka ophis jong ka Meghalaya Basin Management Agency ha Nongrim Hills Shillong ha ka ba ki la don shibun ki ba la wan shakhmat ban ïashim bynta ban ai snam da la ka jong ka mon sngewbha.
Haba ai jingkren ha ka prokram kaba lyngkot na ka liang ka doktor Myrthong ka la ong ba ka jingai snam mon sngewbha ruh ka dei ka sienjam ka ba shlur na ka bynta ka kam kaba bha.Ka la ong ruh ba shi unit ka snam ka lah ban pyllait im haduh laingut ki mynsiem briew, bad ïa kane ka snam ba la ai mon sngewbha yn pynlong ha ki lai tylli ki bynta, kata ka RBC, Platelets bad Plasma.”
Namar ba ka jylla Meghalaya ka dang wan ha ka kyrdan ka ba hadien eh ha ka ba ïadei bad ka jingdon jong ki briew ki ba wan shakhmat ban ai snam da ka mon sngewbha, kumta ruh ki ba kum kine ki jingïalap kin ai shibun ki jingmyntoi na ka bynta ban pyllait im ïa ki ba bun ki para mynsiem briew.
Kumba la pynpaw da kiba bun ki ba la wan shakhmat ban shim ïa kane ka bynta ha kaba ai snam mon sngewbha, na ka liang u Bah Vivek khongsti u la pynpaw hadien ba u la pyndep ïa ka jingai snam da ka ba ong; “kane ka jingai snam mon sngewbha ka dei shibynta jong ka jingrakhe ïa ka taïew pynneh pynsah mariang ka bym shym dei tang ha ka ban ïada ïa ka mei mariang hynrei ruh ïa ki para mynsiem briew.
