Shillong, Jylliew: Da ki spah ngut ki nongkyrshan u Bah PT Sawkmie hynne ka sngi ki la rung bad pynïasoh bad ka UDP, Mawlai Circle.
Ha kane ka jingpynïasoh ki la ïoh ruh ban jied ïa ki nongkitkam thymmai jong ka UDP Mawlai Circle, ha kaba ïa ka kam President la bat hi da uba la ju bat, u bah Homer Kharkongor, lai ngut ki Working president, bah Alex Lynser, Raymond Khyriem bad bah Batskhem Makdoh, 5 ngut ki vice president u bah O.D Syiemlieh, bah John Kharmawphlang, bah Justin Passi, bah Iabeit Khongwar bad bah Kit Sun.
Kumjuh ïa ka kam General Secretary ruh la bat hi da uba la ju bat bah Teibok Kharkongor, Assistant Secretary bah Balakmen Dkhar, lai ngut ki joint secretary, u bah Rapbor Mawlong, bah T. Sawian bad bah Damarson War, ka kam Tresurer ka la leit sha u bah Lamphrang Mylliem Umlong, Chief Organiser bah Franky Massar, organising secretary bah Asterious Lyngdoh, public secretary bah Roveno L. Mawnai, assistant secretary bah Raymond, ki adviser bad ki excutive member.
Haba ai jingkren ha kane ka jingïalang u bah Homer u la pdiang sngewbha ïa baroh ki ba la rung dkhot sha ka UDP Mawlai circle bad u la pynskhem ruh ïa ki kum ki dkhot ba pura jong ka seng.
“Ka UDP ka don ïa ka jingkyrmen ba kan lah ban bat ïa u lakam ha u 2023 ban ïoh ïa ka bor synshar bad kane ka dei kaei kaba ngi ïohi kum ka party,”ong u bah Homer bad u la bynrap, “Ha ka sien banyngkong kum ka UDP Mawlai circle ngi la ïoh ban pynlong ïa kum kane ka jingïalang na ka bynta ban pynkhlaiñ ïa ka party na ka bynta ka ilekshon 2023,” bynrap shuh shuh u bah Homer. “Ngim ju lap MLA kum u bah PT Sawkmie, uba la trei shisha met bad mynsiem na ka bynta ka Mawlai. Uba ïai don ryngkat barabor bad ki paidbah, uba phin lap beit haba phi leit wad ïa u.”
Ha kajuh ka por u la kyntu ïa ki paidbah ba kin kyrshan ïa u Bah PT Sawkmie, namar ba u dei u briew uba trei bad ba kin ym kyntait ïa une u mawlynnai. “To ngin ym bret ïa u mawlynnai ha khmat ki sniang,” ong shuh shuh u bah Homer.
Ha kane ka sngi la ïoh ruh ïa ka jingkren na u bah Teibok Kharkongor, bah Franky Massar, bah Lamphang Mylliem Umlong bad kiwei kiwei pat.
Ha kane ka sngi da kawei ka jingmut ki la ïa rai ban trei shitom ban pynjop don burom ïa u kyrtong jong ki u Bah PT Sawkmie, uban sa rung shen sha kane ka seng riewlum.
