Shillong, Naiwieng, 18: Ki nongthohkot bad ki myllung na ki bynta bapher jong ka ri India ki la ai jingïaroh bad thap kti ban ïoh sngew ïa ki jingrwai myllung jong ka kong Amabel Susngi ïa kaba ka la pynwandur lyngba ki jingthoh ïa kaba ka la pynsngew ha ka Shillong Literary Festival kaba saw kaba dang ïaid mynta ha Nan Polok.
Ka kong Amabel Susngi ka dei ka nongrwai tynrai kaba pynkhie im biang ïa ki sur kynoi tynrai jong ki Khasi naduh kulong kumah.
Ka kong Amabel ka la pyndep ïa ka Grade 5 Music Theory na Trinity College na London. Kawei na ki jingrwai kynoi jong ka kong Amabel kaba la ïa kren ha kane ka tamasa jong ka thoh ka tar ka dei ka jingrwai ha ka ktien pnar kaba la tip kum ka Ha Yupiam ka Bei lane ha pneh ka kmie.
Ki paidbah kiba wan sha kane ka tamasa khamtam ki samla pule kiba sngewtynnad ban thoh kot, ki la ïoh shibun ki jingai jingmut bad ki jingmyntoi haba ki ïohsngew ïa ka jingïakren hapdeng ka kong Amabel bad u bah Daryll Diengdoh uba la buh shibun ki jingkylli ïa ka bad kaba kham sngewtynnad ka long ba kiba wan ban sngap ïa kane ka jingïakren ki la ïoh ruh ïa ka lad ban kylli jingkylli na ka kong Amabel bad ban ïa syllok bad ka. Kane ka dei ka jingïakren hapdeng ka kong Amabel bad u bah Daryll Diengdoh.
