La pynlong ïa ka jingialap paidbah halor ka Social Awareness and Action to Neutralize Pneumonia Successfully (SAANS)

Khliehriat naiwieng 18: Ka ophis jong u District Medical &Health Officer, East Jaiñtia Hills District mynta ka sngi ka la pynlong ïa ka jingialap paidbah ne ka campaign halor ka Social Awareness and Action to Neutralize Pneumonia Successfully (SAANS) campaign bad ïa kane ka prokram la pynlong ha Sutnga CHC.
Haba kren ha ka jingialang, u District Medical &Health Officer, East Jaiñtia Hills District, u Dr D. Shylla u la ong ba kane ka jingpang pneumonia, kam dei shuh ka jingpang kaba dang thymmai bad ka dei ka jingpang kaba lah ban sumar bad ïoh jingkoit lada pynkloi ban shim ïa ki jingsumar, kane ka dei ka jingpang kaba lah ban ktah ïa ka shadem bad ki dak ki shin jong kane ka jingpang ki sdang na ka baiongkhlieh, jyrhoh bad pang shit bad kane ka jingpang ka ktah khamtam ha kito kiba dang khyllung bad kiba dang rit kyrta.
U Dr Shylla, u la kren ruh halor ki lad ki lynti kiba ka tnat ka koit ka khiah ka shim halor ka jingthmu bad iada ïa kane ka jingpang khamtam ha ki khyllung ki khynnah bad la pynlong ruh ïa kane ka jingialap paidbah khnang ba ki paidbah kim dei ban kheiñ sting hynrei ba ki dei ban shim khia kloi kloi ban shim ki jingsumar bad iada ïa ki khynnah khyllung ban lait na kane ka jingpang pneumonia.
Na ka liang ka District Immunization Officer, East Jaiñtia Hills District, ka Dr (Mrs) N. P. Suchiang ka la pynshai halor ki jait jingpang kiba iadei bad kane ka pneumonia, ka por ban dih ïa ki dawai ne jingshah sumar bad ka la ban jur halor ka jingdonkam ban shim ïa ki injek (immunization), ka la bynrap shuh shuh ruh halor ka phang ban ïada ïa kane ka jingpang pneumonia ba ki paidbah ki dei ban peit thuh na ki dak ki shin kiba paw bad ban shim ïa ki jingsumar kham kloi.
Ka Dr N.P. Suchiang ka la ong ruh ba kane ka jingpang pneumonia ka kthah bha ïa ki khynnah kiba hapoh 5 snem kyrta, ban iada ïa ki khyllung khynnah ban lait na kane ka jingoang, ka la pan ruh ïa ka jingiatreilang bad ki ASHA bad pynshlur ne kyntu ïa ki ASHA ba ki dei ban kyntu bad pynshlur ïa ki briew ha ki shnong ki thaw ba ki dei ban ban leit mar mar sha ki jaka sumar ban shim ïa ki jingsumar ban iada na kane ka jingpang pneumonia.
Ha kane ka prokram, ka kong R. Pala, CHO, Sutnga CHC lem bad ki ASHA ki la pyni nuksa (demonstrated) ïa ki hynñiew tylli ki ki bynta ne ki steps ban sait bha ïa ki kti ha ka rukom ban lait na ki khñiang jingpang.
Kiwei pat kiba la ai jingkren ki kynthup, ka Medical &Health Officer, in-charge Sutnga CHC, ka Dr (Mrs) R. Toi, u DPM, NHM, East Jaiñtia Hills District, u bah A. Dhar bad ka BPM, NHM, Saipung C&RD Block, East Jaiñtia Hills District, ka kong Theimon Phawa.