Shillong, Naiwieng, 18: U General Secretary jong ka KSU NEHU Unit u samla Kevin Nelson Wanrap u la kem pang biang ha ka sien kaba ar bad namar ka jingjur shaba palat ka jingshitom la pynkit noh marmar ïa une u samla sha Civil Hospital Shilong ha ka janmiet Lah Sngi u Blei.
Ka Chief Medical Officer (CMO) jong ka Health Centre ha skulbah NEHU ka Dr. Caroline Mukhim ha ka jingïakren bad ki lad pathai khubor ka la ong, ba ha ka jingïohi jong ka, ki samla pule lada kin dang ïai bteng ïa ka jingshah thngan ka lah ban poi pynban sha ka jingjia kaba sngewsih.
Ka jingshah thngan jong ki samla pule ka skulbah NEHU ba la pynlong da ka NEHUSU bad ba la kyrshan lang da ka KSU NEHU Unit ka la kynjoh mynta sha ka sngi kaba 14 ban dawa hiar shuki ïa u Vice Chancellor u Prof. PS Shukla.
Ka NEHUSU bad ka KSU NEHU Unit ki la ong ba kin sa weng noh ïa ka jingïakhih tad ynda u Prof. Shukla u la hiar shuki.
“Kum ka doktor ha ka jingpeit jong nga, kam i long shuh ba kin dang bteng. Iwei i khynnah mynta ngi dang shu pynkit sha Hospital. U Sandy uba dang shu wan phai na hospital ruh u dang don hapdeng ka jingshitom haduh mynta bad kim treh hi ruh ban bam.
“Ka Sorkar ka ladei ban leh eiei khnang ba kine ki khynnah kin sangeh noh ka jingshah thngan namar ha ka jingpeit jong nga, kam i long shuh ba kin dang bteng hynrei ka lah ban poi pynban sha kaba sngewsih,” la ong shuh shuh ka Dr. Mukhim.
