Da ka Retreat ba 3 sngi yn pynlong u CM shisien 6 bnai ban buddien ïa ki jingtreikam ki tnad sorkar

Shillong, Naiwieng 17 : U Myntri Rangbah ka jylla u Conrad K Sangma u la ïathuh ha ka jingrakhe ïa ka National Press Day ba kum u nongïalam jongka sorkar MDA u don ka jingpynkhreh ban pynlong noh da ka Retreat man la hynriew bnai ka ban neh lai sngi lynter ha kajuh ka jaka khnang ba ha katei ka Retreat yn ïoh ban bud dien kumno ki ophis jong ki tnad bapher bapher jongka sorkar ki pyntreikam bad pynïaid shakhmat ïa ki kam bapher bapher ban ïarap ïa ki paidbah.
Haba batai shai halor ka Retreat u Myntri Rangbah u la ïathuh “ Ha kane ka Retreat baroh ki Minister, ki Ophisar jongki tnad sorkar bepher bapher kin ïa sah lang ban ïa khyllie bad bud dien kumno ki ophis treikam bapher bapher jongka sorkar ki treikam ban shakri ïa ki paidbah. Yn bud dien kumno la pyntreikam ïa ki skhim bapher bapher, kumno ki tnad sorkar kum ka PHE, PWD, tnad kam bor ding, tnad kam jngohkai, ki tnad CR & D bad kiwei kiwei ter ter ki treikam bad shakri ïa ki paidbah”.
Ka jingthmu ka long ba ki ophisar kin shim khia ban ai ka jingshakri hok ïa ki paidbah khnang ban sted ki kam ki jam nadong shadong. U la ïathuh kum ka jingsdang kin sdang shwa na Sohra nangta hadien kane kin sa pynlong sha kiwei kiwei ki jaka.
“ Nga ngeit skhem lyngba kane ka Retreat kan ïarap ïa ki tnad sorkar bapher bapher bad wat ïa ki myntri sorkar ruh ba kin tip kumno ki tnad ba ki bat ne peit ki treikam baroh shi katta” ong u Myntri Rangbah.