Shillong, Naiwieng 16: U Myntri Rangbah ka jylla u Conrad K. Sangma bad u Myntri ka sorkar pdeng uba khmih ïa ka DoNER u Jyotiraditya Scindia u la pynbna ïa ka jingbuh ïa ka ‘skywalk project’ ha Mawkdok kaba ha East Khasi Hills bad ïa kane la pynbna hapoh ka Shillong Cherry Blossom Festival.
Ka Mawkdok kadei ka jaka peitkai kaba pawnam bha, bad ka long kaba donkam ban buh kane ka projek ha kaba ki nongwan jngohkai kin ïoh ban ïeng ban khmih ïa ki jaka ba itynnad ha ka jingleit kai jong ki sha Sohra tourism circuit. Ha Mawkdok, lah ban sakhi ban ïohi ïa ka jingitynnad jong ki lum ki them bad ki jingjyrngam ki lum ha baroh ki liang.
Ka skywalk project kadei ka prokram ba la sdang da ka sorkar ban kyntiew ïa ki kam jngohkai ha kane ka thaiñ. “Ka kam jngohkai kadei kaba kongsan bha na ka bynta ka jingkiew ïa ioh ka kot ha kane ka thaiñ. Ngi kyrmen ba ka DoNER Ministry kan ïaibteng ban kyrshan ban kyntiew ïa ki kam jngohkai”, ong u Myntri Rangbah ka jylla.
Haba ong ba ka sorkar jylla ka don ka thong ban kyntiew ïa ka Meghalaya sha ka pyrthei, u Myntri Rangbah u la ong ba jingïatreilang bad ka ri Japan ka long kaba kyrpang bha bad ban rah ïa kane ka tamasa sha kawei pat ka kyrdan. U la ong da ka jingïatreilang bad ka ri Japan kan sa pynlah ïa ka pyrthei ban tip shaphang ka Meghalaya, ka kolshor bad ki jinglong ba ïajan bad ki ri ka Asia.
U Myntri Rangbah u la ai khublei ïa ka ri Japan ba ka la buh ïa ka ‘Japan Arena’ hapoh kane ka jaka ka tamasa kaba pyni ïa ka jingbun ki kolshor, ka bam, ka tem ka put bad ki kam ïalehkai.
Haba pynbna ba la plie ïa ka Japan Arena, u Myntri ka DoNER u Jyotiraditya Scindia u la ong, “Ka long kaba khraw ban don ha Meghalaya ban sakhi ïa ka bor kaba rhem bad ka jingkmen jong ki nongshong shnong kane ka thaiñ shatei. Nga kmen ban ïohi ba ka Cherry Blossom Festival ka la ïaid sha kawei pat ka bynta. Nga ai khublei ïa ka Japan halor ka jingdon jingïadei kaba jan bad ka India”.
U Scindia u la ïaroh ruh ïa u Myntri Rangbah halor ka jingïalam jong u ban kyntiew ïa ka festival kum ka Cherry Blossom. “Ngam pat ïohi ïa kane ka kyrdan jong ka jingrhem mynsiem ha kano kano ka concert ha India. Nga ai khublei ïa u Conrad bad ïa ki nongshong shnong ka Meghalaya,” bynrap u Scindia.
U la ong ba ka Meghalaya kam dei ban long tang ka nongbah ka tem ka put ha India, hynrei na ka bynta ka Asia.
