Shillong, Naiwieng, 16: Ka North Eastern Hill Students Union (NEHUSU) ka la pynpaw ïa ka jingsngewdiaw halor ka jingbym pynrung jong ka Ministry of Education ka Sorkar India ki kyrteng ba la tyrwa da ka Union hapoh ka komiti ka ban tohkit ïa ki kynrum kynram hapoh ka skulbah NEHU.
Ka Ministry of Education ka Sorkar India ha ka sngi Palei ka la thung da ka komiti kaba kynthup arngut ki dkhot ban tohkit halor ka jingkynnoh ba don ka jingpynïaid bakla bad ka jingbym lah ban pynïaid ïa ki kam hapoh ka skulbah North Eastern Hill University (NEHU).
Ïa kane ka rai la shim hadien ka jingïakhih shah thngan ba khlem pud sngi ba la lamkhmat da ka North Eastern Hill University Students Union (NEHUSU) bad ba la kyrshan da ka Khasi Students’ Union (KSU – NEHU Unit) mynta la shiphew sngi kynthih, kiba dawa ban weng mardor ïa u Vice Chancellor u Prof P.S Shukla, ïa u Registrar u Omkar Singh bad ïa u Deputy Registrar u Amit Gupta.
Kane ka komiti ka kynthup tang ïa u Prof DP Singh, uba dei u Chairman jong ka University Grants Commission (UGC) kum u Chairman jong ka komiti bad u Prof Dilip Chandra Nath, u Vice Chancellor barim ka Assam University.
U General Secretary jong ka NEHUSU u samla Toniho Kharsati haba pynpaw ïa kane hakhmat ki nongïalam ka Mawlai Town Dorbar ha ka sngi Saitjaiñ u la ong, “ki la kylli ïa ngi, ïano phi kwah ban pynrung kum ki dkhot ha ka komiti hynrei kaba sngewsih ka long ba ka Ministry of Education kam shym la pynrung ïa ki kyrteng ba ngi la tyrwa hapoh ka komiti tohkit.”
“Lada ka wan ka jingtohkit, hato kan sngap bha neem ïa ki jingdawa bad kata ka dei kaba pynsngewdiaw bha ïa ngi,” u la ong.
U la kynnoh ruh ba ka jingthung ïa ka jingtohkit ka long tang ban shu pynthame ïa ki samla pule kiba pynlong ïa ka jingïakhih khnang ba kin dup pynsangeh noh.
“Lada ki sngewkhia shisha, ïa ki kyrteng kiba ngi la ai, ki la dei ban pdiang bad ban pynrung lang ha ka komiti tohkit,” la ïai ban u General Secretary ka NEHUSU.
“Ka jingphet jong u Vice Chancellor ban shim shuti haduh 15 sngi bad ka jingwan jong ka jingtohkit ruh ka dei 15 sngi kane ka pyni ba ki ladep ïakren sha lyndet da ka jingïasngewthuh jingmut,” la kynnoh une u nongïalam ka Union.
“Naduh nyngkong ka sngi ba u wan u Vice Chancellor, u long pyrshah ïa ki trai ri trai muluk bad ïa ki Khasi bad dei halor kata ka nongrim ba ngim sngew skhem wat ïa ka komiti ka ban pynlong ïa ka jingtohkit,” la bynrap une u nongïalam ka NEHUSU.
“Ka jingïai bteng jong ka NEHUSU ïa ka jingïakhih ka long ba ka Sorkar India kan dup sngewthuh ba ym tangba ki jingtohkit ba ka la thung ngin hap ban shu pdiang beit katba ma ki, ki leh. Lada dei shisha ba ki pyrkhat ïa ka bha ka mïat jong ngi, ki la dei ban shim ïa ki kyrteng ba ngi la tyrwa,” u la ong shuh shuh.
U la pynpaw ka jingsngewkmen ïa ka jingkular jong ka Mawlai Town Dorbar ban ai jingkyrshan pura ïa ka jingïakhih jong ki samla pule ka skulbah NEHU.
