Khliehriat, Naiwieng 16: Ha ka jingïalang ba kyrpang ba la pynlong mynta ka sngi ha Community Hall Khliehriat West, ki seng bad ki kynhun bapher bapher kiba ju peit ïa ka jingiaid beit ki kam ki jam ha ka khaïi, ka pateng, ki la thaw ïa ka Joint Action Committee (JAC), ha kane hi ka sngi la jied ruh ïa ki nongkitkam bad ki dkhot jong ka JAC.
Ki seng kiba la thaw ïa kane ka JAC ki kynthup ki hynriew tylli ki kynhun, ka East Jaiñtia Coal Supplier and Minerals Association, ka All Jaiñtia Cement Clinker Association, ka East Jaiñtia Hills Truck Owners and Transporters Association, ka East Jaiñtia Drivers Association, East Jaiñtia Limestone Supplier Association bad ka Jaiñtia Coal Miners and Dealers Association.
Ki nongkitkam jong katei ka JAC kiba la jied ki kynthup u President, u bah Justine Dkhar, uba dei ruh u MLA barim jong ka Khliehriat, General Secretary, u bah Soomeyo SNS Sayoo, Treasurer, u bah Hambertus Nongtdu, Adviser, u bah Amos Dkhar bad u bah Deibor Sungoh.
La thung ïa baroh ki President jong kitei ki hynriew tylli ki kynhun kum ki Vice President, kumjuh ruh baroh ki Secretary jong kitei ki hynriew seng kum ki Assistant Secretary jong ka JAC bad la jied ruh 33 ngut kum ki dkhot ka Executive Committee.
Katkum ka jingiathuh jong ki nongïalam ka JAC, la ong ba hadien ba ki la iohi bad bishar bniah ïa ka jinglong jingman ka rukom long ka khaii ka pateng, ki la lap ba ki don bun ki jingdkhoh ha kiba bun ki bynta kiba ju wanrah jingeh bad wanrah ruh ka jingduh nong ïa ki paidbah nongkhaiï bad kane ka jingduhnong ki nongkhaïi ka ktah ruh ïa ka khaïi ka pateng jong baroh ki paidbah solonsar ba bun ba lang kiba ju im da ka khaïi ka pateng ha ka ïa die ia thied, kumta ki nongïalam bad ki dkhot jong kitei ki hynriew tylli ki kynhun da kawei ka jingmut ki la shim ïa ka rai ban thaw noh da ka Joint Action Committee ka ban peit bad jngoh kyrpang ïa ka jinglong jingman ka khaïi ka pateng ha ri lum Jaiñtia, la ong ba kane ka JAC kan khanglad ruh ïa ka jingwan tulkar palat ki bor kiba na bar kiba ju wan ban shim kabu ban kamai spah da kaba suk na ri lum Jaiñtia bad ka JAC kan shim kam ruh ha kiba bun ki bynta kiba iadei bad ka ïa die ïa thied ba ka rukom pyntyllun ïa ka khaïi ka pateng ba ka dei ban long kaba iaid beit iaid ryntih ban im ja lang baroh ki paidbah, namar ka ri lum Jaiñtia hi ka dei ka jaka kaba ju pynmih buh bha ki mar pohkhyndew, kumjuh ruh ki mar rep bapher bapher bad ka dei ruh ka jaka kaba kiba bun ki nongshong shnong naduh ki por ba mynshwa ki ju im da ka khaïi ka pateng.
