Shillong, Naiwieng 15: Ka Nongkseh SC bad ka Mawtawar SC ki la long ki kynhun kiba seisoh ban ïoh khur pura ïa ki lai point hadien ba jop ïa ki jingïakhun jong ki ha ka lympung First Division Football League 2024 jong ka Shillong Sports Association, ba la long ha ka sngi Thohdieng (15.11.2024) ha madan First Ground-SSA Stadium, Polo.
Ka Nongkseh SC ka la lah ban pynliem da 3-1 kol ïa ka Mawkhar SC, katba ka Mawtawar SC ka la jop da 4 – 1 kol ïa ka Malki SC.
Ka kylla step hapdeng ka Nongkseh bad ka Mawkhar ka la ïakhaid ha kaba baroh arliang mamla ki la pynkhihjar mar shi sien. U Fastborn Khongsit u la buh hakhmat ïa ka Nongkseh lyngba ka kol ha ka 21 minit hynrei la shah pynïakhaid noh ha u Rickyshan Warjri (43min) na bynta ka Mawkhar shuwa ban wai shiteng.
Ka Nongkseh ka la ïoh ban lamkhmat ïa ka jingïalehkai dei ha ka 64 minit na ka kol u Chesterpaul Lyngdoh, bad pynthikna ïa ka namjop da kaba pynkhih sa kawei lyngba u Samphrangshai Rani (87min).
Haba phai sha ka jingïakhun kaba ar, ka Mawtawar SC ka la ïoh ban tehlakam ïa ka jingïalehkai naduh ba sdang. Ka Mawtawar ka la lamkhmat da 2 kol ha ka kylla step, lyngba ki kol na u Fedrick Lyngdoh (1min) bad u Larry C Mawlong (12min). Ha ka 75 minit u Thomos Dkhar u la pynkhih ïa ka kol kaba lai.
Ka Malki SC ka la ïohlad ban pynphai shi kol lyngba u Majumi Lando Tariang (85min) shuwa ba u Rishan M Umlong (88min) un thep ïa ka kol kaba khadduh na bynta ka Mawtawar.
Ha kane ka sngi Saitjaiñ (16.11.2024) kan don tang kawei ka jingïalehkai ha ka SSA 1st Division FL 2024 ha kaba ka Sohryngkham SC kan aireng pyrshah ïa ka Umphyrnai SC ha ka por 2 shiteng mynsngi.
