Shillong, Naiwieng, 15: Khatwei sngi hadien ba ki samla pule jong ka skulbah North Eastern Hill University (NEHU) ki la pynlong ka jingshah thngan ban dawa hiar shuki ïa u Vice Chancellor u Prof. PS Shukla, u Myntri Rangbah ka Jylla u Conrad K. Sangma ha ka sngi Thohdieng u la leit jngoh ïa kine ki samla tang kum u riew madan.
Wat ïa ki lad pathai khubor u Myntri Rangbah u la mana ba ym dei satia ban ring dur katba u dang ïakren bad ki nongïalam jong ka NEHUSU bad ki samla pule kiba shah thngan.
Hadien ka jingïakren bad ki samla pule kiba shah thngan, u Conrad Sangma u la leit phai noh bad ki Pulit kiba ju pahara ïa u baroh 24 kynta.
U General Secretary jong ka NEHUSU u samla Toniho Kharsati ha ka jingïakren bad ki lad pathai khubor u la ong, “u Myntri Rangbah u la pynpaw ba um shym la wan kum u Myntri Rangbah ka Jylla hynrei u la wan tang kum u riew paidbah. Ngim lah pat ban klet ba u Conrad Sangma u dei u Myntri Rangbah jong ka jylla baroh kawei.”
“U la kyrpad ïa ngi ban pynkut noh ïa kane ka jingïakhih shah thngan bad ban pyrkhat ïa ka koit ka khiah. Hynrei ngi la pynsngew ha u, kumba ngi la sdang ïa kane ka jingshah thngan ka long halor ka jingdawa ban weng ïa u Vice Chancellor bad ngi la kyrpad ïa u Myntri Rangbah ba un pynsngew sha ki tyndong skhor ka Sorkar Pdeng ïa ki jingdawa jong ngi ki samla pule namarba da lade hi u la ïohi da la ki jong ki khmat ïa ka jinglong jingman hangne hapoh skulbah,” ong u General Secretary ka NEHUSU.
Haba kynthoh halor ka jingaipor kaba khat san sngi jong ka Ministry of Education ïa ka Enquiry Committee ban pynlong ïa ki jingtohkit ïa ki kynrum kynram hapoh ka skulbah NEHU, u samla Kharsati u la ong, “hato ma ngi ki samla ngi dang lah neem ban shah sa kita ki 15 sngi namarba ngi ladep ban batai shai ba ngin ym weng satia ïa ka jingshah thngan katba ngim pat ïohi ba u Vice Chancellor ba un hiar shuki. Mynta ka shong sa ha ka jingstad jong ka Sorkar Pdeng bad ka Sorkar Jylla ban shim ïa ki lad ki lynti.”
U General Secretary ka KSU NEHU Unit u samla Kevin N. Wanrap haba bynrap halor kane u la ong, “ngi bynñiaw ïa ka jingwan jong u Myntri Rangbah namarba u wan tang kum u riew madan. Ngi dang khmihlynti ba kat u Myntri Rangbah un wanrah ïa ka khubor kaba bha bad ba un kham ñiat tyngeh ïa ka Sorkar Pdeng hynrei um shym la don eiei hynrei u shu pynpaw tang ïa kaba bha namarba u shu wan tang kum u riewpaidbah.”
“Kat u Myntri Rangbah uba don ka iktiar ba ngi la jied bad u la long u khliehduh ban long ka sur sha Delhi hynrei kam shym la don eiei. Nyngkong ngi dang ïohi ïa ka jingkyrmen hynrei haba u wan ban ïakren bad ngi ban shu ong ba u sngewthuh ïa ki jingeh. Kumno um ïohi ba ma ngi, ngin jynjar haduh katneï” la kynthoh une u nongïalam ka KSU.
U la ïathuh ba haduh mynta ka sngi kaba khatwei, ki la don ki samla pule kiba nang tlot bad kiba la shah pynkynriah sha ka Health Centre jong ka NEHU. “Sa katno pat ki ap ne ïoh lehse ki ap sa tang ba ngin shu ïap tyrsawï Ngi ki samla pule ngi sngewsih ïa ka jingwan jong u Myntri Rangbah bad ngi ngeit ba ïoh um don ka bor ban kren ne um nud ban ang wat tang shi kyntien hakhmat ka Sorkar India,” la kynthoh shuh shuh une u nongïalam ka KSU NEHU Unit.
U la ong ruh ba u Myntri Rangbah u dei ban ïakren bad ka Sorkar India na ka bynta ban pynïoh ïa ka jingdawa jong ki samla pule.
“Katba nang pynslem ngi ruh ngin ym ïapeiñ ïa ki mat kiba ngi la shim, ngi ngeit ba kaba bha tam kan wan ha kine ki ar sngi ne katno sngi ngim tip hynrei na ka liang jong u (Myntri Rangbah) u shu pynpaw ïa kaba bha bad kat u Myntri Rangbah u la dei ban tynruh mardor bad ban pyndik ïa ka Sorkar Pdeng bad kumno un shu ieh ïa ngi ki samla pule haduh katne. Ngim kwah ba ki mat (ba ngi ïakhih) hapoh NEHU kin shu long tang kum kiwei pat ki mat kum ka ILP, ka jingpynrung ïa ka ktien Khasi ha ka Khyrnit Baphra bad ba kin shu long tang ki jingïakren tang na rymmiang shyntur,” u la bynrap.
Ha kane kajuh ka sngi, ki samla pule ki la leit tohkit ruh na ki Guest House bad ki Quarter ba sah ki nonghikai bad ki nongtrei ka skulbah NEHU ban wad jingtip shaphang u Vice Chancellor.
