Shillong, Naiwieng 15: U MP ka Congress na Tura, u Saleng A. Sangma u la ong ba un sa shim khia halor ki jingjia hapoh ka skulbah North Eastern Hill University (NEHU) bad ban ïakren ruh hapoh ka North East MP Forum ban ïoh ka jingtuklar noh mardor na ka President jong ka ri India ka Droupadi Murmu bad kumjuh ruh na u Myntri ka sorkar pdeng uba khmih ïa ka tnat Pule puthi u Dharmendra Pradhan.
Haba kren sha ki lad pathai khubor na ka liang u Sangma u la pynpaw ka jingsngewkhia halor ka jinglong jingman hapoh NEHU, ha kaba ki samla pule ki la pynlong ïa ki jingshah thngan mynta lah 10 sngi, ha kaba ki la dawa hiar shuki ïa u vice Chancellor Prof PS Shukla.
Na ka liang u Sangma u la banjur halor ka jingdonkam kaba kyrkieh halor kane ka kam da kaba ong, “Ngin pyrshang ban ïakynduh bad ki paralok kiba don hapoh ka North East MP Forum la shai ka sngi. Baroh ki la pynpaw ïa ka jingsngewkhia naba ka NEHU ym tang ba ka ai ka jingshakri tang ïa ki samla jong ka jylla Meghalaya hynrei na ka bynta kane hi ka thaiñ shatei lammihngi. Ngan ïasyllok ïa kane bad kiwei ki dkhot bad yn sa shim ïa ka rai ïa ka por ban ïakynduh ïa ka President jong ka ri India.”
U Sangma u la pynrem ruh ïa ka sorkar jylla ba kam lah ban shim khia ban pynbeit ïa kane ka kynrum kynram hapoh NEHU. “Ka jingshim khia jong ka sorkar ban pynbeit ïa kane ruh ka long kaba tlot bha. Kim shym khia ban shim ïa ka rai,” u la ong, da kaba kdew ruh ïa ka Inner Line Permit (ILP) kum ka nuksa.
“Na ka bynta ka NEHU, ruh ka paw ba ka jinglong jingman ka long kumjuh. Lada la shimkhia bha da u Myntri Rangbah, ngi ladei ban ïoh ka rai. Kumta ha ryngkatlang bad kiwei ki MP na kane ka thaiñ shatei lammihngi (Northeast Forum), nga la pyrkhat ban shim khia ïa kane ka kam sha ki bor ba dei khmih kaba kynthup ruh ka jingïakynduh ïa u Myntri ka sorkar pdeng uba khmih ïa ka tnat pule puthi bad kumjuh ruh na ka President jong ka ri India. Ki samla jong ngi ki la ngat ha ka jingshitom tang na ka daw ka jingshimrai jong ki katto katne ki ophisar ha NEHU. Ïa kine ym dei satia ban shah ba kin batai ïa ki kam.”
Haba ong ba ka NEHU ka la hiar ka burom jong ka, u Sangma u la ong, “Ka NEHU ha ki por mynshwa ka la ïoh ka jingithuh kum kawei na ki skulbah ba paw bha hapoh ka ri India. Hynrei mynta ki samla pule ki la mad ïa kane ka jingeh tang na ka jingbym shimkhia jong ka sorkar ha kaba nga sngew ba ki briew kiba nabar ki la wan ban tuklar ïa ki kam jong ka skulbah.” Na ka liang u Sangma u la pynthikna ruh ba u la dep ban ïakren bad ki nongïalam shnong bad ki la pynpaw ïa ka jingdonkam jong ka jingshimkhia jong ka sorkar jylla ban pynbeit ïa kine ki kynrum kynram.
