Buddien biang ka JNC-WZ na u DM&HO ban pynjanai ïa ka jingshakri ha ka koit ka khiah

Khliehriat, Naiwieng 13: Ka Jaiñtia National Council, Western Zone, hapoh ka jing lam khmat jong u President, u samla Hamehi Bamon mynta ka sngi, ka 13 traik naiwieng ka la leit ban ïa kynduh biang ïa u DMHO jong ka West Jaiñtia Hills Districts bad buddien ïa kaei ka ba ka seng ka la dep ban iakren myn ha u bnai risaw ha kaba ïadei bad shibun ki mat kiba iadei bad ka tnat ka koit ka khiah, halor kane ka seng ka la iohi ba ka la don ki jingsei soh namar ka jingshim khia u DM&HO bad ka seng ka khmih lynti ba baroh kito kiba ka seng ka la dep pynsngew kin urlong, kiba long na ka bynta ka jingbit jingbiang ki paidbah. .
La ong ba ka kane ka jingia kynduh biang ka JNC Western Zone ïa u DMHO mynta ka sngi, ka seng ka dap da ka jingsngewnguh ïa ka Office jong u DMHO ba ka la shim khia ïa kaei kaei kaba ka seng ka la buh da ka jingujor myn ha u bnai ba la dep khamtam ha kaba iadei bad ka MCH ka Civil hospital barim ha Jowai, ha kaba ka office ruh ka lah dep wan ban pynlong ïa ka jingjurip bad shim ïa ka rai ban pynbun ïa ki jaka thiah jong ki nongpang kumba la buh jingthoh da ka seng bad kane kan long ka jingmyntoi ïa uba bun ba lang.
U kyrwoh na ka JNC Western Zone u iathuh shuh shuh ba na ka liang u DMHO, u la pynpaw ruh ba ïa ka PHC ha Pdengshakap ka tnat ka koit ka khiah kan sa sdang noh shen ban tei da ka jingtei ne ka building kaba thymmai, ha kajuh ka por ha kaba iadei bad ka jingdonkam ban don ki nongiarap ha ka kam post mortem ruh, ka office jong u DMHO ka la ong ba kin sa thung ïa ki nongiarap ne ki assistant ban iarap da kaba kin shu siew da ka nongsngi.
“Ha kane ka sngi ruh ka seng ka la buddien ïa ki jingdawa jong ka bad la ioh jubab ruh na ka sorkar ba kan sa maramot noh ïa ka jaka ban shna ïa ka Nursing College ryngkat bad ka Nursing Examination Centre kaba don ha Mukhla, West Jaiñtia Hills District kumba ka seng ka la dawa.
Khatduh katwai, ka seng ka la pynpaw ka jing sngewnguh ïa ka sorkar ba ka lah shimkhia bad pdiang ïa ki jingdawa jong ka seng kiba long na ka bynta ka bha ka miat jong ki paidbah.
Kum ban shu phai dien, ka Jaiñtia National Council JNC-Western Zone myn ha ka 8 tarik u risaw ka la leit ïakynduh markhmat bad u District Medical & Health Officer jong ka West Jaiñtia hills, u Dr. Dhar, ha kane ka jingiakynduh u President ka Zone la ioh ban ïa kren bun tylli ki mat kum ka MCH jowai (Civil barim) ban pynbun ïa ki jaka thiah ki nong pang, la iakren ruh ïa ka bynta kaba iadei bad u nongleh post mortem ha Civil hospital, Ïalong, namar ba don tang u wei bad kane ka wanrah ka jingthut ha ka kam bad bun na ki paidbah ki juh ud ïa kane, ka seng da ka jingsngewkhia kala kyrpad ïa u DMHO ban leh ïa kaba donkam eh na ka bynta ban pynsuk ïa ki paidbah bad ba ka kam ruh kan kloi.
Na ka liang ka seng ka la pynsngew ruh ha kaba ïadei bad ka jingduna ki nongñiah kali (driver) ha ki jaka ai jingsumar kum ha ki PHC/CHC, Shuh shuh ka seng kala ban jur ruh ha kaba ïadei bad ki kali kit nongpang ne ki ambulance bad ka jingleh mynleh jong ki nongtrei ba iadei bad ki kali kit nongpang ne ki ambulance, halor kane la ong ba ka seng ka la juh ioh bunsien ki jingujor ïa kane ka jingleh sting ki nong ñiah ambulance khamtam ha ka por ba donkam kyrkieh da kaba ki shu ai daw ba la sniew ki ambulance, ka seng ka buh hakhmat eh ïa kane ka bynta bad la kylli ruh na u DMHO balei la shu iohsngew beit tang ïa kata ka jingsniew ki ambulance ha man la ka por bad la kyntu jur ïa u DM&HO ba un sngewbha ban leh ïa kaba donkam.
U President jong ka zone u la ioh ruh ban iakren ha kaba ïadei bad ka jingduna ki dawai dashin ha ki PHC/ CHC, kum ki injection ter ter namar ba ki paidbah bunsien ki hap ban leit sha kiwei pat ki jaka ban thied dawai, kumjuh ruh ka jingbym biang ki kor pynmih bording kum ki generator ha ka por ba duh bor ding ha ki jaka ai jingsumar.
Ka ssng ka la ïakren ruh ïa ka jingeh ba don ha PHC Pdengshakap, Amlarem Block ha kaba ïadei bad ka jingjot ki kamra thiah ba thiah ki nongpang ba la i donkam ban pynshna bha noh lym kumta kan ktah lut ïa kane ka jaka ai jingsumar baroh kawei bad kan sa wanrah ruh ka jingeh bakhraw ïa ki paidbah.
Khatduh ka seng ka buh ka jingkyrpad hakhmat u DMHO ryngkat ka jingthoh ban wanrah noh da ka centre na ka bynta ki nongthoh exam nurse ha Ri lum Jaiñtia khnang ban pynsuk ïa ki nongialeh exam kiba na ka ri lum Jaiñtia khamtam ha ka liang ka leit ka wan “ngi ngeit skhem ruh ba lyngba ka jingdon kine ki centre kum jong ka NEET kan long ka jingkyrkhu kaba khraw” la bynrap shuh shuh u samla Hamehi Bamon, President Jaiñtia National Council JNC-Western.
La ong ruh ba naka Liang u DMHO, Dr. Dhar u la kular hakhmat ka seng ba un sa shimkhia ïa kine ki mat bad un sa leh ruh ïa kaba donkam tam ban wanrah ka jingshakri kaba bha tam na ka bynta ki paidbah.