Shillong, Naiwieng 10: Ka khubor ba la ïoh na ki pulit la ïathuh ba u Rahul Kumar Gupta u la phah ka jingujor ba hapdeng ka miet jong ka 4 bad 5 tarik mynta u bnai, ki runar bym lah ban ithuh ki la prong hapoh ka dukan jong u kaba don ha Mawlonghat, Ïewduh, Shillong bad ki la tuh ïa ki tiar kiba bun jait.
Ha kawei pat ka jingjia na ka liang ki pulit ki la ïathuh ba u Lahat N Marak, President, Williamnagar Market Association (EGH) bad kiwei pat ki la ujor lang pyrshah ïa u Tatara N Marak, President, AHAM, Williamnagar Zone, ïa u Aimarong K Marak, GS, ïa u Satwan Savio Ch Marak, kiba dei ki dkhot halor ka jingkynnoh ba ki la lute ïa ka pisa napoh kine kiba shong dukan hapoh ka ïew Williamnagar (EGH).
Shuh shuh na ka liang ki pulit ki la ïathuh ba uwei u nongshong shnong jong ka Tura (WGH) u la phah ka jingujor pyrshah ïa kawei ka ‘Fibe Institution’ (third party loan provider) ba ka la pynkthah klieh ïa u da kaba ka la ïai phone manla ka por, naduh jong u bnai Nailar, 2024, ha kaba ïadei bad ka jinghap ban siew ïa ka pisa kaba u la shim kylliang.
Une uba la ujor u la ïathuh ba u la shim kylliang ka pisa kumba T. 1 lak napoh katei ka institution hynrei u la ïohpdiang tang kumba T. 34,320/- ka pisa.
