Nongpoh, Naiwieng 08: Kum ka jingai mynsiem ïaki samla pule ba kin nang kiew shakhlieh bad shaphrang haka jingpule ba ka jaitbynriew mynta ka donkam ïaki riew shemphang, ki riewstad, ki khraw pyrkhat ban long ki nongïalam, ka KSU Pahamsyiem Unit mynta ka sngi kala pinup burom ïa 16 ngut ki samla pule kiba la pass bha haka eksamin SSLC bad HSSLC mynta u snem naki skul bapher bapher.
Ïa ka jingpynkup burom la pynlong ha phyllaw jong ka Basic School ha Pahamsyiem ha kaba u Samla Reuben Najiar, Assistant Secretary bad Chairman ka Employment and Monitoring Cell ka KSU sengkmie u la wan ban shim bynta kum u kongsan haka jingdonlang u Samla James Hitler Mawphñiang Legal Affairs Secretary ka KSU sengkmie, u Samla Ferdinald Kharkamni President ka KSU North Khasi Hills District, Bah Wanphrang Sumer Asst. Rangbah Shnong, ki nongïalam naka Pahamsyiem Unit ryngkat ki dkhot ka seng, ki longkmie longkpa bad ki khun samla.
Ka KSU ka la pynlong ruh ka jingai jinghikai halor ka jingma jong u drok bad ka jingktah ïaki khun samla ha kane ka juk kaba mynta bad ban ai jinghikai ruh shaphang ka lynti jong ka lawei jong ki ba kin tip kumno ban shim ïaka sienjam hadien ba kila pyndep ïaki jingpule bapher bapher.
Haba kren ha kane ka sngi ki nongïalam ka KSU naduh u Bah Reuben Najiar bad kiwei kiwei kila ai ka jingïaroh ïa baroh ki khun samla kiba la pass bha ha ka eksamin SSLC bad HSSLC bad kane ka dei ka khyrdop ka jong ki ba kin jied ïala ka jong ka jingim shano ba kin leit namar kane ka dei ka jingsdang jong ka jingpule bad ka thong haka jingim.
Ki la ong ruh ba kane ka dei ka por ka jingïakhun haka jingim naduh ka pule ka puthi, ka jingim samla, namar kam long kaba suk ïaki khun samla haba ki leit ban wad jingstad kylleng sawdong ka pyrthei, hynrei ka shong haka mynsiem lade jong uwei pa uwei ban jied ïa kaba bha bad kaba sniew bad dei tang ka jingstad hi ka atiar ban ïakhun haka jingim shimet ne imlang ka sahlang bad ka jaitbynriew hi baroh kawei.
Ki nongïalam kila kyntu ruh ïaki samla ba kin trei shitom bad minot thop kumba ka KSU ka ju pyrshang ban ïarap ïaki samla pule kiba duk tasam bad kiba donkam ka jingïarap ban pynrung haki jaka pule kum ka skulbah USTM bad RIST ba kim donkam ban siew pisa bad kane kala long ka jingkyrkhu kaba khraw ïaki khun samla kiba kwah ban bteng ïaki jingpule ba kham shalor.
