Pyrshah ka SRS Ri-Bhoi ban pyndait ïaki ‘Smart Meter’, dawa ban ai jingpynshai shuwa sha ki paidbah

Nongpoh, Naiwieng 04: Ki nongïalam ka Synjuk ki Rangbah Shnong Ri-Bhoi District hapoh ka jingïalam u Bah BB Makdoh kum u Chairman ryngkat ki Rangbah Shnong naki shnong bapher bapher mynta ka sngi kila leit ban ïakynduh syndon ïa u Deputy Commissioner ka Ri-Bhoi District u Abhilash Baranwal ban pynpaw ka jingpyrshah halor ka jingthmu jong ka tnad MeECL ban pyndait da ki Smart Meter ha kylleng ki shnong ha Ri-Bhoi District.
Haba kren sha ki lad pathai khubor hadien ka jingleit kynduh naka liang u Bah BB Makdoh u la ong ba kum ka kynhun ki Rangbah Shnong ka pyrshah jur ïa katei ka jingthmu jong ka tnad MeECL ban pyndait da ki smart Meter ha ki shnong ha Ri-Bhoi, watla ka dei kaba dang shu pyrshang ne kaba dang sdang, hynrei kum ka tnad sam bording kala dei shuwa ban ai ka jingpynshai sha ki paidbah bad nongïalam shnong kumno ka rukom treikam kitei ki smart meter khnang ba ki paidbah kin shai namar kumba long mynta ki paidbah ki sah haka umdum, namar ka komiti kaba shim kontrak ban pyndait ïa kitei ki smart meter kala shu leit rung sha ki shnong bad pynbor ïaki paidbah.
U la ong ruh ba kiba bun ki paidbah kiba duna ka jingnang jingtip ki la shu pdiang hynrei la ioh jingtip pat ba ka bai bording ka kiew bun shah hadien ba pyndait da u smart meter kaba la buh jingeh shikatdei ïaki paidbah khamtam ki longiing ba duk ba rangli bad kum ka synjuk ka dap ruh da ka jingsngewlyngngoh kaba khraw halor ka jingpynleit jingmut ka tnad MeECL ban bujli ne kylliang ïaki meter na kawei ka por sha kawei pat katba kam ju don pat ka jingbujli ïaki post elektrik bala jan khyllem.
Dei halor katei ka nongrim ba kum ka kynhun ki Rangbah Shnong kala kyrpad na u DC ba dei ban pynsangeh shuwa mardor ïaka jingleit pyndait ïaki smart meter khamtam sha ki shnong nongkyndong katba ka tnad MeECL kam pat lah ban ai jingshai sha ki paidbah kaei ka jingiohnong bad ka jingduhnong haba pyndait da u smart meter bad kyrpad ruh ïaki paralok Rangbah Shnong ha kylleng ka dong Ri-Bhoi ban snohkti lang bad ban ai jingkyrshan ba kan nym wanrah kano kano ka jingbym sngewtynnad hadien habud, la bynrap u bah BB Makdoh.
Halor katei ka jingleit kynduh ka kynhun ki Rangbah Shnong, naka liang u DC ka Ri-Bhoi u la kular ban shimkhia ïa katei ka kam bad ban ïakren bad ki bor bahalor jong ka tnad MeECL.