Shillong, Naiwieng 04: Ka Achik Conscious Holistically Integrated Krima (ACHIK) ha ka sngi Nyngkong ka la dawa ban thung noh mardor ïa u ne ka Pro Vice Chancellor jong ka Tura Campus ka North Eastern Hill University (NEHU).
Ha kaba ïadei bad kane ha ka shithi sha u VC ka NEHU, ka ACHIK ka la ong, “Ngi kyrpad ba dei ban thung noh mardor ïa u ne ka Pro VC jong ka Tura Campus ha NEHU. Ka jingbym don u ne ka Pro VC ha Tura Campus ka la wanrah ïa ka jingdkoh ha ka jingtrei jingktah ïa baroh ki nonghikai bad ki samla pule.”
Na ka liang ka ACHIK ka la ong ruh ba ka jingdon u ne ka Pro VC ha Tura Campus ka long kaba donkam halor ki daw kiba kynthup ïa ka jinglah ban shim rai kloi halor ki kam kiba kyrkieh jong ka campus, ban tuklar ïa ki jingeh ki samla pule ha kane ka jaka pule, ki academic program bad ki jingdonkam ki nonghikai nalor kiwei pat ki kam kiba kongsan.
