Shillong, Naiwieng 03 : U Bah Process T Sawkmie u la pynpaw ba ki 20 snem kum u nongmihkhmat u la shakri ïa ka Mawlai Konstitwensi kum u kpa trai, ïa kaba u sngewthuh bha ïa ka jingeh ki paidbah, kiba duk ba suk, kiba sngewsih bad bun kiwei ki kam jong ki paidbah babun balang.
ïa kane u bah Sawkmie u la pynpaw ha ka jingïalang jong ka jingïakynduh jong u ïa ka dorbar shnong Umrynjah ha ïing shnong ha ka sngi Saitjain ka 02 tarik u Naiwieng, 2024.
U la pynpaw ïa ka jingsngewkhia ba ki paidbah ka thaiñ ki la mad jingeh bha ha kine ki sngi, ba ka Mawlai ka la hiar pynban ha ka jaka ba kan kiew, katba shaba phai ki paidbah ki ud ki nam, khamtam kiba pang shitom, ki samla kim ïoh pynlong shuh ïa ki football tournament kumba ki ju pynlong bad bun kiwei pat.
U pynpaw ruh ba un ïai bteng ban shakri ïa ki paidbah, watla um long eiei shuh.U bah Sawkmie ha kane ka sngi u la kner ruh ïa la ki kti ban ai jingiarap ïa ka dorbar shnong Umrynjah da ka song pisa na ka bynta ka jingdonkam jong ki.
Ha kane ka jingïalang la ïoh ruh ïa ka jingkren na ka liang ka dorbar shnong ba la kren da u bah PR Thabah, ka President Seng Longkmie ka kong KH Thongni, na u President Seng Samla bah R. Lyngdoh, na u assistant secretary ka Umrynjah Sports Club u samla R. Nongdhar kiba la pynpaw ïa ki jingeh bad ki jingdonkam jong ki sha u bah Sawkmie.
ïa ka jingïalang ha kane ka sngi la pynïaid da u secretary shnong bah Leading Kharshiing.
