Shillong, Naiwieng 03: Ki jingpyrkhing halor ka jingïaid jong ki kali heh na ka jingkieng Umïam dam ka la wanrah ka jingkiew dor ha ka kit ka bah bad ki marbam kaba long haduh 40% bad kane kadei na Guwahati sha Shillong. Mynshwa ki trok kiba kit ïa ki tiar kiba kongsan la shah ba kin ïaid beit sha Shillong na Umïam hynrei hadien ba ka sorkar ka la pyntreikam ïa ki jingpyrkhing, ki la hap ban ïaid tam sa 80-90 km, na Umïam sha Mawryngkneng bad ban wanphai pat sha Shillong.
Katto katne ki nongkit ne transporter ki bym kwah ban pynpaw kyrteng ki la ong ba kane ka jingkiew ka dor ha ka kit ka bah ka long ka daw jong ka jingkiew dor ruh ki tiar kiba kongsan ha Shillong.
Haba ong ba ki tiar ki khamtad ha Jowai ban ïa ha Shillong, kine ki transporter ki la ong ba ka jingkiew dor ki tiar na Guwahati sha Jowai ka long Rs 1 shi kilo katba ha Shillong ka long Rs 1.40 shi kilo.
Ym duna ïa ki 50 tylli ki trok kiba kit ïa ki tiar kiba kongsan kynthup ïa ki marbam kiba rung sha Shillong manla ka sngi. “Ka sorkar ka ïam haba don ka jingkiew dor kaba long 5%. Hangne ka dor jong ka kit ka bah ka la kiew da 40%, hap ai khublei ïa ka rai kaba ym don ka jingïadei ha kaba ïadei bad ki kam khaïi,” ong uwei na ki nongñiah trok.
Ha shwa jong ka jingmaramot ïa ka jingkieng Dam, baroh ki kali kiba khia ki ju pyndonkam ban ïaid na jingkieng Umïam ban leit sha Shillong. Hynrei hadien ba la sdang ka jingmaramot ka la don ka jingpyrkhing ïa ki kali ban kit ïa ki tiar ha kaba ki hap ban kit tang haduh kumba 9 metric ton. Kane ka rukom treikam ka la don ha kane ka jaka mynta la kumba 3 bnai.
Ban khmih ïa kane ka jingsngewkhia, ka sorkar ka la peit da kawei ka lynti kaba long lyngba ka Mawïong. La ong ba ka kam mynta ka la nang ïaid bad kan shim por sa kumba 1 snem eiei ban pyndep.
