Shillong, Naiwieng 03: Ka Jylla Meghalaya mynta ka mad ïa ki jingeh kiba khraw ha kaba ki don haduh 18,000 ngut ki nonghikai kiba khlem pat shah hikai ha ka jylla, kaba la pynlong ïa ka sorkar ban phai sha ka sorkar pdeng ban ïoh ka jingkyrshan na ka bynta ban plie ïa ki online programme kiba ïasynriem bad ka Diploma in Elementary Education (D.El.Ed).
“Ki don mynta haduh 18,000 ngut ki nonghikai kiba khlem pat ïoh ki jingshah hikai ha ka jylla. Hadien ba u Myntri khynnah ka sorkar pdeng uba khmih ïa ka Skill Development u la wan jngoh dang shen, ïa kane ka kam la dep ban ïasyllok. Kam long kaba suk ban hikai lut ïa baroh tang ha ka shisien hikai,” ong u Myntri ka tnat Pule Puthi ka jylla u Rakkam A Sangma.
Katkum ka jingïathuh jong u Sangma, kine ki 18,000 ngut ki nonghikai ki kynthup ïa kito kiba hikai ha ki skul sorkar, ki SSA, ki ad-hoc, bad kiba hikai ha ki jaka pule shimet.
U la pynkynmaw ba ka Meghalaya kham mynshwa ka la tyrwa ban hikai ïa ki nonghikai lyngba ka National Institute of Open Schooling (NIOS) hynrei la pynsangeh noh ïa kane ka program ha u snem 2017. Haba bynrap ïa kane ka jingeh, ha ka jingbishar jong ka Supreme Court haba ïadei bad ka mukotduma kaba la jia ha Uttarakhand ka la ngeit ba ka online D.El.Ed program ka dei kaba ym lah ban pdiang ban thung kam hikai ha ki skul sorkar.
Ha kawei ka liang u Sangma u la pynshai, “Ha Meghalaya, baroh ki NIOS-qualified D.El.Ed diploma holder ki la long kiba la khreh ban ai ki jingshakri, kumta ka jingkylli ïa ka jingdonbor ne jingtreikam kam paw hangne.”
Na ka liang u Myntri u la bynrap da kaba ong ba ka jylla mynta ka la hap phai khmat sha ka Ministry of Education, IGNOU, bad NIOS ban pynlong bad plie biang ïa kine ki programme online kiba ïasynriem, kum ka D.El.Ed course ha ka por mynshwa. Haba kylli lane ka jingduna ha ka jingshah hikai kan ktah ne em ïa ka pule puthi ki khynnah pule, na ka liang u Sangma u la jubab da kaba ong, “Ka training ka long kaba kongsan, hynrei suki suki, ka jingaiti ka long kaba kham kongsan bha. Ka diploma ne ka certificate kam pat kyntiew bha ïaphi hynrei ka jingaiti ka long kaba donkam.”
U la pynpaw ruh ba ki jingpyrshang jong ka sorkar ban pynïar ïa kane ka jingai jinghikai (training) ïa ki nonghikai bad ka District Institutes of Education and Training (DIET) kaba thymmai la dep ban buh ha Williamnagar bad Tura. U la ong ruh ba ki jaka pule kum ka Martin Luther University ki la aplai ban pan jingbit na ka bynta ban tyrwa ha ki jingpule B.Ed course.
