Khliehriat, Naiwieng, 03: Ki Pulit District Executive Force (DEF), East Jaiñtia Hills District ha ka step sngi Saitjaiñ ki la ïoh kurup haduh 2800 bilor ka dawai jyrhoh Phensedyl Cough Syrup na kawei ka sem syiar bym pyndonkam shuh kaba don ha shnong Pynurkba.
Kine ki dawai ki don 100 ml ha uwei pa uwei u bilor dawai.
Ka jingleit kurup jong ki Pulit ka East Jaiñtia Hills District ka long hadien ba ki la ïoh ïa ka jingtip ba thikna bha na ki tnat syntiat. Ha ka jingkurup ïa ka dawai, la sakhi lang da ki riewpaidbah.
Halor kane ka jingïoh kurup ïa ka dawai jyrhoh, ki Pulit ki la ujor Suo Moto Case ha Ladrymbai Police Outpost bad mynta ki dang pynlong ïa ka jingtohkit kaba bniah ban lap ïa kiba donkti.
