Dawa ka Dorbar ki Waheh Kur Ri Jaiñtia ïa ka JHADC ban thaw aiñ ïa ki kur kiba ai jait kmie

Jowai, Naiwieng 03: Ka Dorbar ki Waheh Kur Ri Jaiñtia kaba la long ha ka saitjaiñ ha Chilliang Raij Jowai, ki la shim ïa ka rai ban dawa ïa ka Executive Committee jong ka Jaiñtia Hills Autonomous District Council (JHADC) ba kan thaw da ka Aiñ na ka bynta ka lawei jong ki kur ki jait kiba don hapoh u pud u sam jong ka JHADC.
Ha kane ka sngi ki la rai ban dawa ïa u CEM ka JHADC u Bah Thombor Shiwat ban ithuh da ka aiñ ïa ka Kur ka Jait na ka Kmie hapoh ka Sixth Schedule.
Ka Dorbar ka la kyrpad ïa u CEM ban pynkloi noh ka jingthaw ïa ka aiñ ban ithuh ïa kito ki jait kur kiba shim ïa kur na ka jait jong ka kmie, na ka bynta kito ki Dorbar/Seng bad ki nongkitkam jong ki kiba ladep pynrung kur sha ka Secretary Executive Committee jong ka JHADC kumba ladep buh por ka EC.
Ha kaba ïadei bad kane ka Executive Committee jong ka JHADC kan pynkloi ban ithuh ïa ki Kur bad ki Seng/Dorbar Kur bad ban phah noh sha ka ophis Deputy Commissioner, khnang ba ka ophis u Deputy Commissioner jong ka West bad East Jaiñtia District kin ai ïa ki Scheduled Tribe Certificate tang ïa ki Kur kiba la ithuh da ka aiñ lyngba ka JHADC.
Ka ophis u DC ka West & East Jaiñtia District, kin pyntreikam ïa ka kyndon kaba pan No Objection Certificate (NoC) na ki Waheh ka Kur kiba la ithuh da ka Aiñ, ban tehlakam ïa kito ki longkmie kiba ïoh tnga bar jylla ki bym dei ki Khasi, ki Pnar, ki War, ki Jaiñtia kiba pan Scheduled Tribe Certificate ïa ki khun jong ki.
La rai ban kyrpad ïa ka JHADC ban ailad ïa ki Kur kiba ym pat dep pynpoi kyrteng ïa ki kur jong ki hapoh ka JHADC.