Nongstoiñ, Naiwieng, 03: Ka Hynñiewtrep Youth Council West Khasi Hills District ka la kynjoh mynta shiphew snem naduh ba la seng ïa ka. Kumta kum ka dak jong ka jingsdang jong ka jingrakhe ïa katei ka lyngkhuh snem ba shiphew, ka seng ka la pynlong da ka jingïalehkai phutbol paralok hapdeng ki dkhot kiba la shnongthait bad ki dkhot kiba dang trei ha ka seng haduh mynta.
Ïa katei ka phutbol la pynlong ha Leonel Futsal Arena Pyndengrei ha kaba u bah Sanjiedkynsai Shangrit nongïalam barim ka seng, u la long kum u kongsan bad u la ot ïa u ribbon kum ka dak jong ka jingplie pyrda ïa katei ka jingrakhe. Ia jingïalehkai ka long kaba itynnad bha namar ba lajan baroh ki dkhot ki ba rim bad kiba dang don ha ka seng ki dei ki rang ïalehkai phutbol ha ki klob bapher bapher hapoh ka district. Ha ka kylla step ki dkhot kiba rim ki la ïoh lad ban thep ïa ka kol kaba nyngkong bad hadien katto katne minit ki dkhot kiba dang don ha ka seng ki la pynphai kylla ha bad haduh ba kut jong ka kylla step ki dkhot kiba dang don ha ka seng ki la ïoh lad ban thep haduh artylli ki kol. Hamar ba sdang ka kylla miet ki dkhot ba la shong thait ki la sei lut ïa ki buit ki sap ba ki don ha kaba ki la ïoh ban pynphai kylla baroh ar tylli ki kol bad ki la poi sha ka jingïakhait ha kaba u nongpynïaid u la hap ban pynïakhun da ka Tie breaker, ha kaba ki dkot kiba la shongthait ki la lah ban pynliem da lai tylli ki kol pyrshah ïa ki dkhot kiba dang don ha ka seng. La sam ïa ki khunsam sa baroh ar tylli ki kynhun kiba jop bad kiba shah rem.
