Nangjan ka Mawlai, Sutnga, Rangdajied bad ka Chipakkore ban rung QF ha ka MSL 2024

Shillong, Naiwieng 01: Saw tylli ki kynhun, ba kynthup ïa ka Mawlai, Sutnga, Rangdajied United bad ka Chipakkore ki la ïoh ban khur pura ïa ki lai point hadien ba jop ïa ki jingïalehkai ba long ha ka sngi Thohdieng jong ka lympung Meghalaya State League 2024 ba la pynïaid da ka Meghalaya Football Association ha ryngkat ka jingkyrshan na ka tnat Sports jong ka Sorkar Jylla.
Na bynta ka Mawlai kaba don ha ka Group-E bad ka Sutnga kaba don ha ka Group-B, kane ka dei ka jingjop kaba ar sien lynter, katba baroh ar ka Rangdajied (Group-D) bad ka Chipakkore (Group-A), ki la ïoh ban kyntiew 4 poiñ ïalade hadien ba ïakhaid ka jingïalehkai ba sdang.
Haba phai sha ka jingïalehkai ha Shillong, u Khrawkupar Jana (27’P, 32′, 44′, 64, 69′, 79′) jong ka Mawlai u la mad ïa ka jingïalehkai kaba seisoh tam kaba u khlem pat la jia mynno mynno ruh, ha kaba u la khyrwit haduh ar tylli ki hat trik (6 kol) ka la pynshlur ïa ka kynhun ban pynliem kput ïa ka Pynursla United haduh 11-0 kol.
Ha kane ka jingïalehkai, u Khrawkupar u la sdang pynkhihjaw nyngkong lyngba ka penalty hynrei kiwei pat ki la wan da ka jingtrei shitom khlem da pynsyrwa ïa ki kabu ksiar, kaba la nang pynpaw ïa ka jingtbit jong u katba dang mih ki jingïakhun.
Hadien ba u la ïoh ban thep saw kol ha ka jingïalehkai kaba nyngkong, u Khraw u la kynjoh mynta 10 kol tang na ki ar sien ïakhun.
ïa kiwei pat ki kol na bynta ka Mawlai la thep da u Reformer Pale (9′), u Arkibor Makhroh (11′, 70′) u bala thep ar kol, u Wanboklang Lyngkhoi (25′) bad u Samlang Rympei (52′).
Ka jingïalehkai jong ka Group-A ha Tura, la sakhi ïa ka Chippakkore kaba ïakhaid ha ka jingïalehkai kaba nyngkong ha ka sngi Nyngkong, ka la lah ban pynliem noh ïa ka Lumsohkhlur da 2 kol.
Baroh ar tylli ki kol ki la wan urlong hapoh 20 minit shuwa ban kut ka kylla miet lyngba u Balthu M Marak (71′) bad u Bijay R Marak (89′).
Ka Group-B ha Mawkyrwat, la sakhi ïa ka Sutnga ka bym shym la mad jingeh pyrshah ïa ka Mawten, ha kaba ka la jop suk da 4-0 kol. Ka Sutnga ka la ïalehkai bha naduh ba sdang bad pynkhih ïa baroh saw tylli ki kol ha ka kylla step, ha kaba u Raplangki Lyngdoh (5′, 45’+2) u la thep ar kol, u Deligent Pdang (7′) bad u Skhemborlang Rupai (41′) ki la ïoh mar kawei.
Ha kawei pat ka jingïalehkai ha Khlieh riat jong ka Group-D, ka Rangdajied ka la ïoh ban khur ïa ki 3 poiñ ba pura naba jop da 2-0 kol ïa ka Mulait United.
Ka Rangdajied ka la pynkhihjar nyngkong lyngba u Pasborlang Khonglikong (29′) kaba dei artad ka kol kaba nyngkong ha kaba ïadei bad ki jingïalehkai ka MSL 2024 ba long ha Khliehriat hadien ba ar tylli ki jingïakhun ba ladep ym shym la don ba lah pynkhihjar. Ka kol kaba la pynthikna ïa ka namjop ka la wan na u Owanijuh Pajuh (90’+4).
Kawei pat ka kynhun kaba la khur jingjop ha kane ka sngi ka dei ka Seven United kaba na ka Group C. Ka la lah ban pynliem noh ïa ka Mawlum Tyrsad da tang 1-0 kol ha ka jingïakhun kaba la long ha Tyrsad, bad ka nam ka long ïa u Kenny Syiemiong (17′) u ba la pynkhih ïa katei ka shi kol kaba kongsan.
Na bynta ka Mawlum Tyrsad kane ka dei ka namrem kaba ar sien lynter bad kaba la pynduh jingkyrmen ban ïohrung sha ka quarterfinal, katba ka Seven United kane ka dei namjop kaba nyngkong.

Ka prokram ïalehkai ha kane ka sngi Saitjaiñ (Por 2 baje nohphaisngi:
Group B (Mawkyrwat): Riango Youth vs Khliehmawlieh
Group C (Tyrsad): Ladthadlaboh vs Nangkiew Shaphrang Lumdiengngan
Group D (Khliehriat): Iatyllilang Lumsehkot Raliang vs Rymbai Skhenshynriah
Group E (Wahiajer): Mawtari Myrdon vs Shillong Lajong
Group F (Shillong): Seng Samla Mawmluh vs Patharkhmah

Ka jingïoh thep kol ha ka sngi Thohdieng:
Group A (Tura): Chipakkore 2 – 0 Lumsohkhlur
Group B (Mawkyrwat): Mawten 0 – 4 Sutnga
Group C (Tyrsad): Mawlum Tyrsad 0 – 1 Seven United
Group D (Khliehriat): Rangdajied 2 – 0 Mulait United
Group E (Wahiajer): ym don jingïalehkai
Group F (Shillong): Mawlai 11 – 0 Pynursla