Nongpoh, Risaw 31: Hapdeng ka jingiphuh iphieng ki samla pule jong ka Ri-Bhoi College hapoh ka lama jong ka Ri-Bhoi College Student Union (RBCSU) mynta ka sngi kila pynhap pyrda noh ïaka taiew lehkmen jong ki ne ka College Events 2024 bala pynlong mynta la shitaiew lynter, bala shim bynta shitrhem da ki samla pule jong katei ka College lyngba ki prokram bad ki jingïakop bapher bapher.
Ïa katei ka College Events la sdang naduh ka 25 tarik mynta u bnai halor ka phang “The dreams of today are the realities of tomorrow” bad la wan ban pynhap pyrda noh mynta ka sngi da u Bah Mayral Born Syiem MLA ka Nongpoh kum u kongsan, bad u Bah RR Makdoh ba dei uwei naki dkhot jong ka Governing Body jong katei ka College kum u symbud kongsan, haka jingdonlang u EC Benny Principal, ki nonghikai lem bad ki samla pule jong katei ka College.
Ha katei ka sngi naka liang ka RBCSU lem bad ki bor pynïaid jong ka Ri-Bhoi College kila pyndon burom ruh ïaki riew rangbah kiba la noh synñiang shibun ïaka College bad kiba la don bynta naduh ba sdang seng ïa katei ka college.
Haba kren ha katei ka sngi kum u kongsan u Bah Mayralborn Syiem u la pynpaw ka jingsngewnguh kaba khraw ban don bynta lang bad ki samla pule ha kane ka jingrakhe, namar kum ki samla nalor ka pule ka puthi ki donkam ka jinglehkmen ban heh ban san bad ban iar ka jingmut jingpyrkhat ban sam ïaka jingstad bad khamtam ban tip ruh ïaka sap kaba ki don haka jingim jong ki.
Haba phai sha ka phang pdeng jong katei ka jingrakhe, u Bah Mayral u la pynshlur ïaki samla pule ba ki dei ban nud ban phohsniew bad ban pynkylla ïaki shaka jingshisha da kaba kyntu ruh ïa ki samla pule ban pyrkhat ïa ka lawei ha kaba kin ioh ïa ki jingangnud jong ki, ban long doktor, ki nongdro dur, ki nongïalehkai, ne ki nongïalam ha ka imlang sahlang, wat hapdeng ki jingeh kiba ki lah ban ïakynduh haka jingim jong ki da kaba ong ba “Kane ka pyrthei kaba itynnad ka long kum ka duriaw ha kaba uwei pa uwei na phi u long u nongñiah lieng, katno phin jngai phin leit ka shong tang ha phi.”
Kum u nongmihkhmat u la pynpaw ruh ba bun naki samla pule ki mad jingeh haka liang ka pisa tyngka khamtam ki samla kiba wan naki longiing longsem ba duk ba jynjar, bad duna ka ioh ka kot, hynrei ka jingsiew kylliang jong ki samla pule ïaka jinglen lade jong ki kmie ki kpa ka dei tang ba kin leh bha haki jingpule bad ban long ki briew kiba don ka dor bad ka akor ka burom haka jingim bad long ruh ki nongrah jingshai man ka jaka ba ki leit.
