Ki Pulit ki don por ban ñiew ïa ki trok High Level, kim don por ban peit kali kit drok: HYC

Nongstoiñ, Risaw 28: Ki nongïalam jong ka Hynñiewtrep Youth Council West Khasi Hills ha ka sngi nyngkong jong ka taiew, ka la pynlong ïa ka jingïaid paidbah ha sor Nongstoiñ kum shibynta jong ka jingpynshai paidbah bad jingpynbna thma pyrshah ïa u drok u ba la kynrei bha kylleng ki jaka.
Hadien ka jingïaid paidbah kaba la sdang najan SBI Nongstoiñ da ki dkhot ka seng ryngkat ruh ki khynnah skul, samla pule bad kiwei, la pynlong ruh ïa ka jingïalang paidbah hakhmat iew Nongstoiñ, ban pynpaw ïa ka sur ban ïaleh pyrshah ïa ka jingsniew bad jingjyllei u drok. Kumjuh ruh ban dawa na ka sorkar ban pyntreikam noh ïa ka Drugs Elimination and Enforcement of Dream (DEED).
Na ka liang ki nongïalam ka seng kynthup ïa u Bah Roy Kupar Synrem President rangbah, Bah Lumlang Kharsyiemlieh President jong ka seng na West Khasi Hills, lem ruh bad kiwei kiwei ki dkhot na ka seng kmie, ki la pynlong ka jingpynshai paidbah ha kaba ki paidbah na kylleng ki la tuid ban shah skhor ïa ka jingkren ki nongïalam.
U Bah Synrem u la ong, “Ka seng ka mih shakhmat ban buh ïa ki jingdawa na ka sorkar kumno ban teh lakam ïa ka jingkharoi u drok ha ka ri ka jong ngi. Ngi angnud ban pynphai pat ïa ki khun samla ïa ki longkmie ki longkpa kiba la ngam ha u drok, ba kin phai pat sha ka imlang sahlang bad ka jingim ba thymmai, kumjuh ruh ban teh lakam ïa ka jingïoh rung u drok sha kane ka ri jong ngi”.
“Hynrei, ki bor pulit ki don por ban ñiew bad kheiñ jingkheiñ katno tylli ki trok jong ki High Level ki ïaid na Nongstoiñ sha Byrnihat. Ki don ïa ka por ban wad jingtip ïa u President bad Secretary jong ka seng shano ki leit shano ki wan bad ïa kiwei kiwei ki jingtip. Pynban kim lah pat ban teh lakam tang ïa ki katto katne ngut kiba wanrah ïa u drok hangne hapoh sor Nongstoiñ”.
“U Drok um wan hi na Shillong hynrei don ki lad ban poi ha Nongstoiñ lane wat ha ka West Khasi Hills baroh kawei. Ka jingkylli ka long balei ki pulit kim lah ban kem ban bat ïa ki briew ba donkti. Kumjuh ruh balei ym lah ban kem ïa ki briew kiba pynpoi ïa u drok na ki thaiñ East Jaiñtia na Ri Bhoi ban pynpoi ha Shillong. Ngi te ngi suba ba lehse ki don ki briew kiba shong ha ka bor kiba don bynta wat ha ki kam khaïi drok ruh”.
“Ngi ïohi ïa ka jinglynga ki nongshong iew namar ka suiñ bneng kam pat dum, ki la hap khang noh ïa ki dukan jong ki khamtam kito kiba don hajan khlieh iew. Ka daw ka dei namar ki sheptieng ba ki samla jong ngi ki la ngop ha u drok. Ka jingtuh ka la jur khamtam hapoh iew Nongstoiñ. Kumta ngi kyrpad lang ïa phi ki nongshong iew ba kumba phi la snohktilang ha ki por ba ngi khynra, ba phin ïai bteng ban kyrshan lem ïa ngi”, ong u Bah Lumlang Kharsyiemlieh.
U la ong ruh, “Ngi donkam ban ïaineh bad leh hok ba ngin ïakhun ïa ki jingïaleh pyrshah ïa u drok u ba wan ban pyndik ha ka jingim ka jong ngi. Kum ka seng ngin ïai dawa na ka sorkar ban pyntreikam noh ïa ka DEED, khnang ban ïakhun ïa ka jingdih drok ki khun samla ha ka ri ka jong ngi”.
“Ngim don daw ne isih ïa ki nongdih drok hynrei ngim kwah ba u drok un rung bad kharoi ha West Khasi Hills. Wat mynta kim duna shuh ïa ka 300 ngut ki samla kiba la ngam ha u drok ha kane ka District jong ngi. Kham bun ki dei kiba hapoh ka sor Nongstoiñ hi kiba la mad bad ngam ha u drok ha kine ki sngi ba la dep”.
“Ha ka jingshisha ngi la dep ïakren ïakynduh bad u DC kumjuh ruh u SP, ba ngi kwah ba ka iew Nongstoiñ kan shngaiñ naduh 4 baje ter ter, ha kaba na ka liang ka Police Department ruh ka donkam ba kan ïarap ban pahara lem na ka bynta ban pynduna ïa kine ki jingsñiew. Hynrei, sngewsih ba na ka lïing ka tnad pulit ka shim sting ïa kane ka bynta”.
“Na ka liang ka seng HYC ngi kyntu lang sha baroh ki paidbah nongshong shnong naduh ki nongshong iew nongshong dukan, ki samla pule, ki khynnah skul bad baroh, ba to ngin shim ïa ka jingkitkhlieh halor kane ka bynta, da kaba ngin ong beit Em ïa u drok bad ban ïatreilang ha baroh ki liang, khnang ba ngin jop ïa kane ka thma pyrshah ïa u drok u ba long u nongpynjot ïa ki samla bad ki longïing longsem”, ong u Bah Lumlang.
Hadien jong ka jingïalang ha New Nongstoiñ Market Complex kaba don hakhmat iew Nongstoiñ, ki dkhot jong ka HYC West Khasi Hills ki la leit pat ha khyrdop jong ka IB PWD, da kaba ot shilliang ïa u Cake kum ka pharshi ïa ka sorkar, kaba long ruh ka jingrakhe dap 48 snem jong ka West Khasi Hills District.
Ha ka jingïalang u Bah Lumlang u la ong, “Ngi la kynjoh mynta ha u mawmer jong ka jingdap 48 snem. Hynrei ka jingot ïa une u cake ba long tang shilliang khlem pyndep ka dei namar kiwei ki District ki la dap ïa ki kam pynroi. Ngi hangne pat ngi dang shah ñiew shilliang khmat ha ka sorkar Jylla.
“Lada phai ha ka pule puthi la ka long ki skul ne ki Kolej ruh ngi dang donkam bun ki jingïarap na ka sorkar. Nangta ki surok ngi dang donkam shibun eh, ki lad jingïarap lane training centre kumjuh ruh ki skul na ka bynta ki ban ieng ha la ki jong ki kjat ruh ngi donkam palat. Ngi dang sahdien sah shrah palat ha kiba bun ki bynta wat ha ka karta ba 48 snem kum ka District. Kumta kane ka jingot cake shilliang jong ka seng ka long ban pynpaw ba ngi sngewsih ba ka karta bad ka jinglong jingman kam ïahap dur satia”, u la ong.