Im ka kyrteng bad ka nongrim i mei ieid Spelity: Khylliap noh ïa ka lynnong ‘Tih Uranium’, ong ka KSU

Shillong, Risaw 28: Kumba ju long hi manla ka snem ka Khasi Student Union (KSU) ha ka sngi Nyngkong, ka la teh ïa ki ‘Banner’ ha kylleng ka nongbah Shillong ban kynmaw ïa ka sngi pyrshah ban tih ïa u Uranium ha kane ka jylla bad ha kine ki poster ki don ki jingthoh kiba ong ‘Wat Tare, Wat Madei, Ngin ym ai lad da lei lei, Khylliap noh ia Lynnong ‘Tih Uranium’.
Ka KSU ka la pyntip, ka 28 tarik u Risaw manla u snem ka dei ka sngi pyrshah Uranium lane ka ‘Anti-Uranium Day’ hapoh ka Jylla ha kaba ka seng ka ju iaipyrshah naduh ki por mynshwa.
Ka jingteh ka KSU ïa ki jingthoh bapher bapher, ka dei ruh kum ka dak ban kynmaw burom ïa i Mei ieid Spility Lyngdoh Langrin (Bam Kwai ha Dwar u Blei) ha ka lyngkhuh sngi ïap ba saw snem, ha kaba ine i mei ieid i la ïeng rangbah ban pyrshah jur ïa ka jingthmu ka Sorkar Pdeng ban tih ïa u Uranium na Domïasiat South West Khasi Hills ha ki snem ba la leit noh.
Mawkyrwat: Ki dkhot jong ka KSU South West Khasi Hills District kum ka jingkynmaw burom ïa ka lyngkhuh sngi ïap ba saw snem jong i Mei-ieid Spility Lyngdoh Langrin ki la leit sha ka shnong Domïasiat, South West Khasi Hills District ban leit buh syntiew ha u lum jingtep kum ka jingñiewburom halor ka jinglong nongïalam kaba khlem pyndem da kaba i Meiieid Spelity i la kyntait ia ka jingtyrwa da ki klur tyngka da ka Uranium Corporation of India Limited (UCIL) ban ai jingbit na ka bynta ban khlong ïa u marpoh khyndew na ka khyndew jong i.
I Mei-ieid Spility i la ïeng pyrshah ban tih ïa u marpoh khyndew Uranium naduh ki snem 1980 ter ter haduh ka sngi ba i la khladnoh na kane ka sla pyrthei bad im shym la pyndem ïa ka jingtyrwa pisa bad ki jingbyrngem byrsit jong ka Sorkar ha kitei ki por.
U President jong ka KSU South West Khasi Hills District u Bah Forwardman Nongrem ha ka jingkren u la ong ba ka KSU ka la pynbna paidbah ba ïa ka 28 tarik u bnai Risaw manla u snem naduh u snem 2021 la ju tip ba ka dei kata ka sngi ban pyrshah Uranium ne ka Anti Uranium Day ha kaba da kane ka seng kan ïai kynmaw ïa u synñiang jong i Mei-ieid Spility Lyngdoh Langrin.
Katba Publicity Secretary jong ka KSU Central Body u Bah Pynshaiborlang Rani u ong ba ka KSU kan nang ïai pynskhem ïa ki nongrim jong ka jingïakhih ban pyrshah ïa ka jingthmu ban khlong ïa u marpoh khyndew Uranium bad da lei lei horkit hordang kin nym ailad ïa ka sorkar ba kan ïoh lad ban khlong.
U Bah Phrijune Lyngdoh Langrin uba dei u khun shynrang jong i Mei-ieid Spility u la pynthikna da kaba ong, “ka ïing ka sem bad ki khun ki ksiew ryngkat ka ïing ka sem kin nym pynjahburom ïa la ka kmie kaba la pruid dak ne kdew lynti bad kin ïai don syndah lem bad ka KSU ha ki por baroh kumba ju long baroh shikatta ban ïai pyrshah ha ryngkat ki kyntien kiba ong, “EM ÏA U URANIUM”.
Kiwei kiba la don lang bad kiba la ai jingkren ki long u Bah Wallambok Syiemïong, Vice President barim ka KSU & Chairman jong ka Synjuk ki Seng Samla Shnong, South West Khasi Hills District, u Bah Balse Kharbani, General Secretary FKJGP South West Khasi Hills District, bad u Bah Franklin Syiemïong, General Secretary jong ka KSU West Khasi Hills District.
Ha kajuh hi ka sngi, ka KSU South West Khasi Hills District dang step ki la leit ban wah ïa ki poster bad banner ha ïew Mawkyrwat kum shibynta ban ñiew burom ïa ka jingïaleh ba khlem pyndem haduh ka sngi ka jingïap jong i Mei-ieid Spility Lyngdoh Langrin.
Kum ban shu pynkynmaw, i Mei-ieid Spility Lyngdoh Langrin i la dei i nonglamkhmat ba nyngkong ha ka jingïakhun ban pyrshah ïa u Uranium naduh ki snem 1980, 1990, 2002, 2007 bad haduh ka sngi ka jingkhlad jong i.
Ha ka por ba ka UCIL ka wan tyrwa da ki phew klur ban aiwai ïa ka khyndew i la kren shai da kaba ong, “Ka pisa kam lah ban thied ia ka jinglaitluid jong nga”, kumjuh ruh ha ka snem 1990 ba ka sorkar ka la pynmih ïa ka Pre – Military Order ban shim duh ïa ka khyndew ka la thoh da ka shithi sha u Myntri Rangbahduh ka ri India bad ka la ong ruh ba, “Kan khambha ban shah khrai khlieh ban ïa kaba duh shi inshi ka khyndew”.