Ka Sngi Kyrpang jong ka Ayurveda 2024

New Delhi, Risaw 28 : Ka Ayurveda ka dei ka rukom ai jingsumar tynrai kaba la sdang ha India ha ki por hyndai. Ka peit ïa ka jingryntih hapdeng ka met, ki jingmut jingpyrkhat bad ka jingngeit ban kyntiew ïa ka bha ka miat. Ka ktien Ayurveda ka wan na ki ktien Sanskrit: ‘Ayu’ kaba mut ka jingim bad ‘veda’ kaba mut ka jingtip.Kumta, ka ktien Ayurveda ka mut ‘ka jingtip shaphang ka jingim’. Ka Sorkar India ka la rakhe ïa ka sngi kyrpang jong ka Ayurveda man u snem ha ka DhanawantariJayanti (Dhanteras) naduh 2016 ban pynsaphriang jingtip shaphang ki nongrim jong ka Ayurveda, ki dawai kynbat, bad ki rukom im.
Ha India, la ngeit ba ka jingtip shaphang ka Ayurveda ka wan na u Dhanawantari, u riewkhuidnongsumaruba la ïoh ïa kane ka jingtip na u Blei Brahma. Ka sngi kyrpang jong ka Ayurveda ka pynkup burom ïa ki jingnoh synniang jong u Blei Dhanvantari da kaba thmu ban pynsaphriang jingtip shaphang ki nongrim jong ka Ayurveda, ki rukom sumar bad ki rukom im.
Katba ka tnad Ayush ka pynkhreh ban rakhe ïa ka sngi kyrpang kaba 9 jong ka Ayurveda ha ka 29 tarik u Risaw, 2024, ka jingrakhe mynta u snem kan long kaba ïar tam, ha kaba 150 tylli ki ri kin ïasoh bad kane ka jingrakhe hapoh ka phang”Ki jingsaindur Ayurveda na ka bynta ka koit ka khiah jong ka pyrthei.”
Ka sngi kyrpang kaba 9 jong ka Ayurveda
Ha ka DhanvantariJayanti bad ka sngi kyrpang kaba 9 jong ka Ayurveda, u Myntri Rangbah Duh, Narendra Modi un plié paidbahshibun tylli ki projek kiba tam ïa ka T 12,850 klur kiba ïadei bad ki kam ai jingsumar da kaba ban jur halor ka jingkut jingmut ka India ban kyntiew ïa ka Ayurveda bad ki lad ban ïoh jingsumar. Ka bynta kaba kongsan jong kine ki jingpyrshang ka dei ka jingpynïar ïa ka All India Institute of Ayurveda (AIIA) lyngba ka jingplie paidbah ia ka Phase -II, kaba kynthup ïa ka Panchakarma hospital, ka jaka die dawai Ayurvedic, ka unit kaba ïadei bad ki dawai ha ki kam ïalehkai, ka central library, ka IT bad ka incubation-centre ïa ki start-up bad ka auditorium kaba lah ban shong 500 ngut ki briew.
Da kaba ithuh ïa ka bor jong ka Ayurveda ban ïarap ïa ki jingshem thymmai ha ki kam ai jingsumar, u Myntri Rangbah Duh un plié paidbah ruh saw tylli ki Ayush Centres of Excellence, kiba long ka Centre of Excellence for diabetes and metabolic disorders ha Indian Institute of Science, Bengaluru; Centre of Excellence in sustainable Ayush for advanced technological solutions, start-up support and net zero sustainable solutions for Rasaushadhies ha IIT Delhi; Centre of Excellence for fundamental and translational research in Ayurveda ha Central Drug Research Institute, Lucknow; bad Centre of Excellence on Ayurveda and Systems Medicine ha JNU, New Delhi. Kine ki saw tylli ki Ayush Centres of Excellence kin peit bniah ïa ka jingkyntiew ïa ka bynta jong ka Ayurveda ban pynbeit ïa ki jingeh ha ki kam ai jingsumar mynta bad ban wanrah ïa ki jingpynbeit kiba ïaineh ha ki lad ai jingsumar.
U Myntri Rangbah Duh un buh maw nongrim ruh ïa ar tylli ki Central Research Institutes in Yoga and Naturopathy ha Khordha ha Odisha, Raipur ha Chhattisgarh. Kine ki sienjam ki long kiba kongsan ban wanrah shakhmat ïa ka Ayurveda ha ki kam ai jingsumar, ka jingkyntiew ïa ki jingwadbniah bad ka jingpyndonkam ïa ki lad ai jingsumar tynrai bad ka jingpyni ïa ka bynta kaba kyrpang jong ka Ayurveda ha ki kam ai jingsumar jong ka India.
Ka jingsngewthuh ïa ka phang
Ka phang mynta u snem, “Ki jingsaindur Ayurveda na ka bynta ka koit ka khiah jong ka pyrthei,” ka peit bniah ia ka jingkyntiew ia ki jingsaindur Ayurveda ban pynbeit ia ki jingeh jong ka pyrthei ha ka koit ka khiah.
Ki thong ki kynthup:
Ka jingialeh pyrshah ia ki jingpang bym iabit bad ka antimicrobial resistance.
Ka jingpynbeit ia ki jingeh kiba iadei bad ka jingkylla ka suinbneng, ki jingpang tymmen bad ki jingpang jingmut jingpyrkhat, bad ki jingpang kiba wan na ka jingbym ïoh ia ka bam kaba tei.
Ka jingban jur halor ka koit ka khiah kum ka jingiada bad ka bha ka miat kaba pura.
Ka jingkyrshan ia ki Sustainable Development Goal (SDG) bad jingthmu Universal Health Coverage (UHC) jong ka United Nations.
Ki phang ha ki snem ba la dep
Ki bynta ban peit bniah ha ka sngi kyrpang jong ka Ayurveda 2024
Ka koit ka khiah jong ki longkmie: Ka jingpynbeit ia ki jingeh ba kyrpang jong ki longkmie lyngba ka rukom treikam ba pura jong ka Ayurveda, kaba peit ia ka bam, ka rukom im bad ka koit ka khiah kum ka jingiada.
Ka bha ka miat ha ki jaka trei: Ka jingkyntiew ia ki nongrim jong ka Ayurvedic ban kyntiew ia ka bha ka miat ha ka met ka phad bad ki jingmut jingpyrkhat ha ki jaka trei, da kaba peit ia ka jingpynduna ia ka jingkhuslai bad ka jingkyntiew ia ka jingseisoh.
Ki prokram na ka bynta ka bha ka miat ha ki skul: Ka jingpynshlur ia ki khynnah ba kin ïoh ka bha ka miat lyngba ka Ayurveda ba kynthup ia ka jingialam lynti sha ka jingkyntiew ia ka jinglah ialeh pyrshah ia ki jingpang bad ka jingïoh ka bam kaba tei.
Ka jingsaindur ha ki mar bam: Ka jingpeit ia ki rukom bam katkum ki nongrim Ayurveda bad ki jingsaindur ha ka bam, da kaba iakhleh ia ki rukom bam tynrai bad ki rukom bam mynta.
Ki sienjam ba la shim
La pynkhrehia ki kam bapher bapher naduh ka 21 haduh 29 tarik u Risaw 2024 ban rakhe ia ka Ayurveda bad pynsaphriang jingtip shaphang ki jingmyntoi kiba wan na ka. Ki kam ki kynthup ia ki prokram ban ai jingtip sha kylleng ka pyrthei, ki jingai jinghikai kumno ban peit ia ka koit ka khiah bad ka bha ka miat, ki prokram paidbah bad ki jingai jingsumar ei. Kine ki sienjam ki thmu ban don ka jingiadei bad ka imlang sahlang bad pyni ia ka jingiarap jong ki rukom Ayurveda. Ka prokram ka la kut lyngba ka bynta kaba kyrpad ïa ka jingkyrkhu na ka bynta ka koit ka khiah bad ka bha ka miat.
Ka Histori
Ka Ayurveda, ka science shaphang ka jingim ka dei kawei na ki rukom ba hyndai bad ba pura na ka bynta ka koit ka khiah. Ka jingkwah ïa ka koit ka khiah bad ka jingim kaba jrong ka dei kaba naduh ki por hyndai. Saw tylli ki Veda kiba ngeit ba dei ki jingthoh ba hyndai tam jong ka India kiba la thoh hapdeng 5000 bad 1000 BC ki la ai jingtip shaphang ka jingai jingsumar da kaba pyndonkam ïa ki jingthung bad ki mar kiba ïoh na ka mariang.
Ki jingbatai shaphang ki dawai bad ki jingpuid briew ki don ruh ha ka Ramayana bad Mahabharata. Hynrei la pynskhem ïa ka Ayurveda kum ka lad ai jingsumar kaba pura naduh ka por jong ka Samhita (compendium) lane kumba 1000 BC. Kane ka thupjingthoh kum ka CarakaSamhita bad SusrutaSamhita ki dei kiba la thoh ha ka rukom kaba ryntih ha kaba don phra tylli ki kam ba kyrpang ha kato ka por. Ïa ki bynta ba kongsan jong ka CarakaSamhita bad SusrutaSamhita la lum bad pynthymmai ha ka AstangaSahgraha bad AstangaHrdaya ba la thoh da u VrddhaVagbhata bad Vagbhata ha ki spah snem 6 – 7 AD. Kumta, kine lai tylli kiba tip kum ka Brhattrayi kata ka CarakaSamhita, SusrutaSamhita bad AstangaSangraha ki la long ka nongrimna ka bynta ki riewshemphang ban thoh ïa kiwei kiwei ki jingthoh.
Ha kumba 200 BC, ki khynnah pule ha ki kam ai jingsumar na kylleng ka pyrthei ki ju wan sha ka skul bah Takshashila kaba hyndai ban ïoh jinghikai shaphang ka Ayurveda. Na u 200 haduh 700 AD, ka skul bah Nalanda ruh ka ju khring ïa ki samla pule ha ki kam ai jingsumar khamtam na Japan, China bad kiwei kiwei. Ki nong Egypt ki la ïohsngew shaphang ka Ayurveda shuwa ka jinghiarthma u Alexander ha u 400 BC lyngba ki kam khaii pateng jong ki bad ka India.Ki nong Greece bad ki Roman ki la ïohsngew shaphang jong ka lyngba ka jingwan hiar thma jong ki. Ha ki bynta ba nyngkong jong ki hajar snem ba nyngkong, ka Ayurveda ka la pur sha ki thain mihngi lyngba ka Buddhism bad ka la don ka bynta kaba khraw ha ki rukom ai jingsumar ha Tibet bad China.
Ha kumba 800 A.D., Nagarjuna u la pynlong ki jingwad bniah shaphang ka jingpyndonkam ïa ki nar ban ai jingsumar. Ki don shibun ki dawai bad ki rukom ai jingsumar kiba don ha ki jingthoh shaphang ka Ayurveda. Hadien ki spah snem ba 16, ki la don ki rukom wad, rukom sumar ïa ki jingpang ba thymmai katkum ki jingstad katkum ka juk mynta.
Ha u 1827, la sdang ïa ka jingai jinghikai ba nyngkong shaphang ka Ayurveda ha India ha ka Government Sanskrit College, Calcutta. Katba ynda wan ki spah snem ba 20, la seng shibun ki kolej Ayurveda ha India hapoh ka jingpeit jong ki Syiem. Ka Ayurveda ka la kham pur ha ki snem 1970 haba ka jingithuh ïa ka Ayurveda ka la kiew biang. La don shibun ki jingwadbniah ha ki spah snem ba 20 bad la thoh shibun ki kot bad la pynlong shibun ki seminar bad symposium.
Mynta ka Ayurveda ka don ki bynta undergraduate, postgraduate bad doctorate ha ka jingpule ha India. La don ruh ka rynsan jong ki nongai jingsumar bad ki nongshna dawai. Ka jingkyntiew ia ki jingdon jingem da ka Sorkar bad ki briew shimet ka la pynïar ïa ka jingïadei bad ki paidbah.
Ka jingkiew ka jingpur ka Ayurveda sha kylleng ka pyrthei
Ka Ayurveda ka dang pur sha kylleng ka pyrthei, ha kaba la ïoh jingithuh katkum ka ain kum ka rukom ai jingsumar tynrai ha 24 tylli ki ri. Kane ka jingpdiang ka pyni ïa ka jingkiew ka bynta jong ka Ayurveda ha ki lad ai jingsumar, ki jingïatreilang kum ka SCO Expert Working Group on Traditional Medicine, BIMSTEC Taskforce on Traditional Medicine, bad BRICS High-Level Forum on Traditional Medicine, kaba la pynkhlain shuh shuh ïa ka Ayurveda. Kine ki rynsan ki wanrah ïa ka jingïasam jingtip bad ka jingpynïahap jong ki polisi kaba plié lad ïa ka jingpyndonkam ia ka Ayurveda ha ki lad ai jingsumar ha kylleng ka pyrthei. Shuh shuh, ki tiar kiba iadei bad ka Ayurveda mynta ki dei kiba la shalan sha palat 100 tylli ki ri kaba pyni ia ka jingdawa ia ki bad ka jingngeit ha ki rukom ai jingsumar bad ki tiar Ayurveda.
Ka jingwanrah ia ki morbidity code na ka bynta ka Ayurveda, Siddha, bad Unani ha ka ICD-11 TM Module 2 da ka World Health Organization (WHO) ka long sa uwei u mawmer , kaba plié lad ia ka jingbuh jingtip bad ka jingithuh ia ki lad ai jingsumar Ayurveda. Ka WHO ka la buh ia ki rukom ai jingsumar bad jingai jinghikai Ayurveda kaba la wanrah ia ka jingryntih ha kylleng ka pyrthei na ka bynta ka rukom ai jingsumar Ayurveda kaba seisoh. Kaba ialam lynti ha kane ka dei ka Global Traditional Medicine Centre (GTMC) ha Jamnagar, Gujarat, ka jaka treikam kaba peit bniah ia ka jingkyntiew ia ka jingwadbniah ka jingai jinghikai bad ka jingpyndonkam ia ka Ayurveda bad ki lad ai jingsumar tynrai.
Ka jingpynkut
Ka sngi kyrpang jong ka Ayurveda 2024 ka rakhe ia ka jingnang jingstad hyndai bad ka jingiahap ka Ayurveda ha kine ki por ba mynta, da kaba pyni ia ka bynta jong ka ban pynbeit ia ki jingeh ha ka pyrthei kiba iadei bad ka koit ka khiah lyngba ka phang mynta u snem, “Ka jingsaindur Ayurveda na ka bynta ka koit ka khiah jong ka pyrthei.”
Lyngba ka jingiashim bynta da 150 tylli ki ri, kane ka prokam ka pyni ia ka bor jong ka Ayurveda ban ialeh pyrshah ia ki jingpang bym iabit, ka antimicrobial resistance, bad ki jingeh kiba wan na ka jingkylla ka suinbneng, kaba pyni ia ka bynta jong ka na ka bynta ka jingiada bad ka jingiaineh na ka bynta ka koit ka khiah. Ka Ayurveda ka dei kaba la ïoh jingithuh ha kylleng ka pyrthei lyngba ka ICD-11 jong ka WHO bad ki jingiatreilang ha kylleng ka pyrthei, bad kumta ki rukom ai jingsumar Ayurveda ki dei kiba dang iasoh bad ki lad ai jingsumar ha kylleng ka pyrthei. Ka sngi kyrpang jong ka Ayurveda mynta u snem ka burom ia ki kam jong u BleiDhanvantari bad ka plié lad ia ki nongrim jong ka Ayurveda ba kin don ka bynta kaba heh ha ki kam ai jingsumar ha ka pyrthei bad ki thong sustainable development goal.