Shillong, Risaw 24: Ka NEHU Shillong ka la ïasoi ïa ka Memorandum of Understanding (MoU) bad ka IKBCC, South Korea ha ka prokram kaba la pynlong ha Golden Jubilee Auditorium, NEHU-Shillong campus. Baroh arliang ki la rai ban rung hapoh ka jingïateh ban kyntiew ïa ka pule puthi ban ïasam ïa ki jingnang jingtip, ban thaw ïa ki lad na ka bynta ki samla pule kum ha ka scholarship bad ki lad ai kam ha India bad South Korea. Kawei na ka jingïatreilang ka dei ka Indo-Korea Business Cultural Centre (IKBCC), kaba la thmu ban pynrung ïa ka kam pule ha ka ktien Korea ha NEHU. Na ka liang u Prof. Shukla, u VC NEHU u la kam ba kane ka jingïateh paralok kan pynkhlaiñ ka jingïadei hapdeng ka India bad ka ri Korea bad ban ai lad ruh ïa ki samla pule ban ïoh leit sha ki bynta jong ka East Asian ban sam mar kylliang ïa ki jingtip halor ka kolshor bad ki lad ïohkam ïohjam.
Ka tnat Linguistics kan long kum ka Nodal Department ban wanrah kiba bun ki jingai jinghikai bad ki jingsam ïa ki syrnot ha ka ktien Korea bad ki kolshor jong ki samla pule jong ka NEHU-Shillong.
Ïa ka MoU la soi da Col. Omkar Singh na ka bynta ka NEHU bad Dr. Zena Chung, Founder Director of Indo-Korean Business Culture Center [IKBCC] ha ka jingdonlang u Prof. P. S. Shukla, Vice Chancellor-NEHU, Prof. P. K. Goyal, Director-IIM Shillong, Prof. A. K. Singh, Chairperson, MoU Committee-NEHU, Prof. Streamlet Dkhar, kiba la don bynta ha kane ka MoU bad Dr. Saralin A. Lyngdoh, Head Department of Linguistics bad ryngkat bad ki Deans jong ki Schools of Studies, bad ki khlieh jong ki tnat bapher bapher jong ka NEHU. Kum ka jingmynjur hapdeng ka NEHU bad IKBCC, Prof. Streamlet Dkhar, Head, Department of Khasi ka la long kum ka Academic Coordinator bad Dr. Saralin A. Lyngdoh, Head, Department of Linguistics kum Course Coordinator na ka bynta ki kam ki jam bad ki prokram na ka bynta ka jingïatreilang hadien habud bad kiwei kiwei pat ki kam.
Na ka liang Dr. Zena Chung, Founder Director of Indo-Korean Business Culture Center [IKBCC] la leit ban jngoh ïa ka Nodal Department bad ka la don ka jingïasyllok kaba bniah ba ki nonghikai hadien ba la dep soi ïa ka MoU. Ïa ka jingïalang la pynïaid da Prof. Streamlet Dkhar bad Head, Dr. Saralin A. Lyngdoh. Ha ka kyrdan kaba nyngkong jong ka jingpyntreikam ïa ka MOU, baroh arliang ki la rai ban pynkhreh ïa ka projek kaba kynthup ïa ka dictionary halor ki ktien Khasi-Hindi-Korean-English. Haba bynrap la ong ba kane ka Nodal Department kan hikai ïa ka course ktien Korea bad kumjuh ruh ka Culture ka ban sdang naduh ka academic session ka ban sa wan kata ha u Naitung 2025 na ka bynta kito kiba kwah ban pule ïa kane ka ktien bad ka prokram.
