Shillong, Jylliew 5: Ka Cricket Lovers Sohra ka la ïoh rah ïa ka nam lahduh jong ka District T20 League Cricket Tournament 2022 ba la pynïad da ka East Khasi Hills Cricket Association (EKHCA). Kane ka nam lahduh ka la wan hadien ba ka la pynliem noh da 33 ron pyrshah ïa ka Nongdawah CC ha ka jingïakhun final kaba la long ha ka sngi Saitjaiñ jong ka taïew ba lah dep.
Haba phai sha ka jingïakhun final hapdeng kine ki ar tylli ki team, ka Nongdawah CC kaba la jop ïa ka jingkynting pisa ka la kam ban kawang bol nynkong ha kaba ka Cricket Lovers kaba la ïoh lad ban tied nyngkong ka la buh ïa ka thong ba 163 ron duh noh 5 wicket ha ki 20 over.
U Winning Star Khongjoh u kamai bun ron da 56 ron ha ki 32 bol bad u Rohit Yadav u kamai 29 ron na ki 27 bol, katba u Bhaboklang Nongpluh u khur 2 wickeet bad ai kamai 32 ron ha ki 4 over na bynta ka Nongdawah CC.
Haba wan beh ïa katei ka ron, ka Nongdawah CC ka kamai tang 130 ron duh noh 10 wicket ha ki 17.4 over bad dei tang u Moonlight War uba kamai bun ron da 38 ron ha na ki 25 bol bud pat u Resting Sari u kamai 18 na ki 18 bol. Kiba la khur wicket na bynta ka Crickt Lovers ki kynthip ïa u Rahul Prem Raiu khur 3 wicket ai kamai 27 ron ha ki 4 over bad u Rohit Yadav u khur 3 wicket ai kamai 20 ron ha ki 3 over.
Ha kane ka sngi nalor ka khusnam nam jop la sam ruh ïa ki khusnam shimet ba kynthup ïa ka khusnam Player of the match ba la ïoh da u Winning Star Khongjoh (Cricket Lovers),
Player of the Tournament Rohit Kumar Yadav (Cricket Lovers).
U Everbloom Nongrum u la ïoh ïa ka scolarship ba la ai da ka Meghalaya Cricket Association na bynta ka Bravery Award ba la pynkup burom da u President jong ka India bad uba dei u nongïalehkai cicket ba mihkhmat ïa ka East Khasi Hills Cricket Association.
