Rah nam lahduh ka Mawkyrwat SA ha ka lympung ïalehkai jong ka SFFT 2022

Mawkyrwat, Jylliew 5: Ka Mawkyrwat Sports Association ka la long ka lahduh ha ka Spring Festival Football Tournament (SFFT) 2022 ba la pynïaid da ka Mawlangwir Sports Club da kaba pynliem da 4-1 kol pyrshah ïa ka Rangjadong Sports Club ha ka jingïakhun final ha ka madan Saitsnad, Mawlangwir, South West Khasi Hills District.
Haba phai pat ha ka jingïalehkai ka long da shisha ka jingïaleh kaba itynnad bha watla ha ka jingïatepkol ka la don ka jingnoh shilliang hynrei ka jingïakhun hapoh madan ka long kaba ïakhaid bad ba ïa biang bor bha. Ka Mawkyrwat SA ka la ïoh ban pynkhih ïa ka jar kaba nyngkong eh ha ka minit kaba 37 na u Ryngkat Wanniang.
Katba ha ka jingïalehkai jong ka kyllamiet, ka Mawkyrwat SA ka la ïoh biang sa ïa ki lai tylli ki kol kata ha ka minit kaba 56 na u Jied Syiemlieh, ha ka minit kaba 75 na u Bovan Kharshandi bad na u Ryngkat Wanniang ha ka minit kaba 90 shwa ban kut ka jingïalehkai, katba ka Rangjadong SC pat kam shym la duh mynsiem hynrei da ka jingïakhun kaba tyngeh ka la ïoh ban thep ïa ka shi kol ha ka minit kaba 80 na u Kynphamlang Thongni.
Kumta haduh kaba kut jong ka jingïalehkai ka Mawkyrwat SA ka la tam noh da 4-1 kol ïa ka Rangjadong SC bad rah syndon ïa ka nam jingjop ha kane ka lympung.
Hadien kaba kut jong ka jingïalehkai la ïoh ban sam ïa ki khusnam bad ka song pisa sha baroh ar kynhun kaba shah rem bad kumjuh kaba poi sha ka thong jong ka jingjop ha kaba la sam da u kongsan u bah F.D. Ramsiej bad da u symbud kongsan u bah Kitborlang Nongrem.
Haba kren lyngkot u bah F.D. Ramsiej kum u kongsan u la pynpaw ka jingsngewsarong ïa la ka jong ka dong ka thaiñ ba ki khun samla ki la sdang ban paw pyrthei ha shibun ki bynta na ka bynta khamtam eh ha ki kam ïalehkai ym tang hapoh ka distrik bad ha ka jylla baroh kawei hynrei war shabar ruh.
Kumta ka jingkiew ha ki kam ïalehkai kam dei eh tang na ka bynta ki jingïoh jingïarap na ka sorkar hynrei ka dei ruh ka jingkyrshan ba rat bah da ki paidbah kiba ieid ïa ki kam ïalehkai kum ha kiwei pat ki Ri jong ka pyrthei shibun ki Sports Club bapher bapher ki ïa riewspah dei na ka jingaimynsiem bad ka jingai jingkyrshan ba pura jong ki paidbah bad ki katto katne ‘riew shimet ki heh spah.
Namarkata, u buh ka jingkyrpad ïa ki paidbah kiba don ka mynsiem ban kyntiew ïa ki kam ïalehkai ba kin ai lem ka kti kamon kti kadiang khnang ba kan long ka jingmyntoi ïa ki khun samla kiba don ïa ka sap ka phong. Ha kajuh ka por u la kitbok kitrwiang ïa ki baroh ar tylli ki kynhun ka Rangjadong Sports Club bad ka Mawkyrwat Sports Association ba kin ïalehkai bha ha kane ka sngi.
Ha kajuh hi ka sngi na ka liang ka Mawlangwir Sports Club ka la ïoh ban pynkup burom ruh ïa ki katto katne ki samla napoh ka shnong kiba la leit ban ïa shimbynta ha ka Meghalaya Game 2022 ha nongbah Shillong bad kiba la wanrah ruh ïa ka nam ka burom.