Shillong, Risaw 17 : U Myntri ka tnad kam jngohkai bad Social Welfare ka jylla u bah Paul Lyngdoh u la ong ba ka jingïakulmar bad jingïaumsnam ha Manipur ka la pynlong ïa ki nongkhaïi drok ban phai khmat bad pyntuid ïa u drok sha kane ka jylla. Kumta halor kane ula ong ba shen yn sa ïakren bad ka sorkar pdeng khnang ba kan ïarap ïa ka jylla kumno ban lah tehlakam ïa kane ka kam namar ka jingtuid u drok sha kane ka jylla ka la nang jur naduh ba jia ki jingïaumsnam ha Manipur.
“ Hooid ngi la ïakhun pyrshah bha ban rat dyngkong ïa u drok na ka jylla Meghalaya. Hynrei ka long kaei kaei kaba sngewsih pat ba kane ka jylla ka long hapdeng, ka jan sha kata ka ‘Golden Tringle’ bad khamtam lei lei ka jingïaumsnam ha Manipur ka la pynlong ïa ki nongkhaïi drok ban phai khmat sha ka Meghalaya. Kane ka dei ka kam kaba khraw duh hakhmat kumno ba ngin ïakhun pyrshah. Ngan sa leit shen sha Delhi bad ngan ïa kynduh ïa ki heh ka sorkar pdeng ban ïathuh bniah ha ki shaphang kane ka jingma kaba ap ïa ka jylla na ka daw ka jingtuid u drok kaba la nang kiew nangkiew shapoh Meghalaya” ong u bah Paul.
Halor ka jingïashim bynta ki Seng Bhalang ban kem ïa ki nongkhaïi bad nongdih drok, u bah Paul u la ong “ U President ka HYC u dei u riew said aiñ phi dei ban kylli na u la u tip ne em shaphang ka kyndon aiñ NDPS ne PITNDPS bad hato ka aiñ ka shah ne em ïa u ne ïano ïano ban leit kem ïa ki briew”?
“ Ngi don hangne ban pynkhlaiñ ïa kibor ka aiñ bad kata ka dei ka dawbah kum kita ki nongthawaiñ jongka sorkar. Mynta haba phi leh ïa kaei kaei kaba long pyrshah ïa ka aiñ kita ki kam jongphi ki long beaiñ. Phi lah ban paw ha ki lad pathai khubor hynrei kam don pat ka jingkylla ha madan. Phi thaw khubor na ka bynta katto katne sngi hynrei kaei kaba phi leh kan ym lah ban ïeng sakhi hakhmat ka ïing bishar bad kumta ka long pynban ka jingshah rem kylla” ong u bah Paul.
“ Namar lada phi phai sha ka aiñ NPDS uno uno uba kurup ïa u drok ne ki jingdih buaid, kita ki mar ki don ha ki bad ki hap ban pynshai thikna kumno kine ki mar ki don ha ki na kata ka daw ngi hap ban pynkylla ïa ka rukom treikam ruh. Phi dei ban tip shai ba ka long ka sien kaba nyngkong ba ka tnad Social Welfare ka la jam sha une u pud ban ïakhun pyrshah ïa u drok lyngba ki jingleit pynsngewthuh kylleng ki jaka. Ha ki por ba mynshwa dei tang ki pulit kiba leh ïa kane. Mynta lyngba ka prokram DREAM Mission kaba la khlieh da u CM ka pynpaw ba ka sorkar ka la shim khia ïa kane ka kam. Ngi hap ba leh ha kata ka rukom ba kan long kat kum ka aiñ khnang ban ym don kino kino ki jingleh bakla” ong biang u bah Paul.
U bah paul ula ïathuh shuh shuh ba kiba bun ki Dorbar Shnong ki dang pynkhreh ban pynkhlaiñ ïa ki Village Defence Party (VDP) ban iakhun pyrshah ïa u drok.
“ Hooid phi lah ban ym ïohi ïa kata hynrei kiba bun ki Dorbar Shnong ki la leh ïa kata ban pynkhlaiñ ïa ki VDP. Ka jingbym paw pyrthei ka dei namar ha kane ka nongbah Shillong ki don tang 11 tylli ki VDP kiba la ithuh kat kum ka aiñ. Kiba bun ki jaka kiba jyllei bha u drok kim don ki VDP. Haba kim don ym don ba kyrshan ne ïarap ïa ki briew ka aiñ bad ki don ki khep ba ki kylla ngiah noh ïa ka kam namar ki hap ban leit mih hakhmat ka ïing bishar, la pynngat kyndon ïa ki, la ujor FIR pyrshah ïa ki Rangbah Shnong ne Dorbar Shnong kumta ïa kine kiei kiei baroh yn lah ban lait tang lada khlaiñ bad don ki VDP namar ki dei ki briew kiba la ithuh da ka aiñ bad ki ïatrei lang ruh bad ki bor pulit.
