Pynsngewthuh ka DLSA, MSLSA ïa ka jingkordor jong ka jingnang jingstad ha Mawkyrwat

Mawkyrwat, Risaw, 15: Ka District Legal Services Authority (DLSA), South West Khasi Hills District ha ryngkat ka Meghalaya States Legal Services Authority (MSLSA), Shillong bad ka Red FM 93.5 Shillong mynta ka sngi ka la pynlong ïa ka jingpynsngewthuh paidbah ne Road Show Awareness Campaign ne ka On-Ground Activities/Roads Show/Studio Shift ha Ïew Mawkyrwat, South West Khasi Hills District.
Ka jingthmu ba kongsan jong kane ka campaign ka long ban pynsngew paidbah halor ki hok jong ki khynnah bad ban ai ruh ki jingpynshai halor ki jingkyrshan ïa ki khynnah kiba kwah ban bteng biang ïa ki jingpule ne kiba khlem leit skul shuh kiba hapdeng ka rta 6 haduh 14 snem ka rta khnang ban ai biang ka lad ka lynti ïa ki ban pynrung kyrteng hapoh ka National Institute of Open Schooling (NIOS) Open Schooling System, ba kin lah ban pyndep ïa ki jingpule jong ki haduh klas XII.
Ka kong RJ Saphi napoh ka Red FM 93.5 Shillong, ka la ong ba ka jingpynlong ïa kiba kum kine ki Road Show Awareness Campaigns ka long ban pynsngewthuh paidbah halor ki lad ki lynti na ka bynta ka bha ka miat jong ki khynnah bad ki samla hapoh ka Jylla Meghalaya da kaba rung ha ki distrik bapher bapher ban pynsngewthuh halor ka jingkordor jong ka jingnang jingstad bad ha kajuh ka por ka dei ka jingïatrei bad ïasnohkti lang na ka bynta ban kyntiew ïa ka pule puthi bad ban pynduna ïa ka jingpep skul shiteng por jong ki khynnah.
Ha kajuh ka por ka la pynshai ruh ba hapoh ka Article 21 la kren shai ba baroh ki khyllung khynnah ha kane ka Ri India ki don ïa kata ka hok ban ïoh ei ïa ka jingnang jingstad bad kumjuh ruh ha ka Clause A jong ka Article 21A ryngkat ha ka Article 51A ka la kyntu ba ka dei ka kamram jong ki kmie ki kpa ba kin pynthikna ban phah skul ïa la ki khun ki kti. Hynrei kaba sngewsih ka long ba haduh mynta mynne dang bun ki bym shym la tip ne ïoh ïa kane ka lad.
Namarkata, ka la pynsngew ba da ka jingsngewkhia ne jingkitkhlieh na ka liang ka Meghalaya States Legal Services Authority (MSLSA), Shillong mynta ka sngi ka la ïoh ban pynlong ïa kane ka prokram ban ai jingpynsngewthuh paidbah da ka jingthmu ban ïalam biang ïa ki khynnah kiba la pep skul sha ki shlem jong ka jingpule bad ban pynthikna ruh ba baroh na ki kin ïoh ïa ka jingnang jingstad ban pynbna pynjanai shuh shuh ïa ka lawei jong ki.
Shuh shuh ka kong RJ Saphi ka la pynshai ruh ba ki don shibun bah ki jingmyntoi ba la wanrah da ka Labour Department jong ka Sorkar Meghalaya kaba dei hapoh kawei ka aiñ kata ka Building and Other Construction Workers (BOCW) Act 1996 ne e-Shram ha kaba hapoh kane ka aiñ ki briew ki lah ban pynrung kyrteng na ka bynta ban ïoh jingkyrshan skul ïa ki khun jong ki kiba pule naduh klas V haduh Master Level, ki lah ruh ban ïoh jingïarap shisien ha kaba ïa dei bad ki kot bad ki sopti skul na ka bynta ar bnai kiba pule klas I bad ter ter bad ki lah ruh ban ïoh T. 500/- kum ka bai thied ïa ki jingdonkam ban thied ïa ki let, ki khulom, ki kopi bad kiwei de.
Ha ka jingbatai jong ka, ka batai bniah ruh ha kaba ïa dei bad ka jingtreikam lyngba ka jingpynrung kyrteng ban bteng ïa ki jingpule lyngba ka National Institute of Open Schooling (NIOS).
Ha kane ka sngi la ïoh ruh ki jingkren jingpynshai kaba ïa dei bad kane ka prokram kata ïa ka phang pdeng la kren da ka Nosmi Hahshah, ïa ka phang ka jingdonkam jong ka jingpule la kren da ka Alphanur Nongsiej, ïa ka aiñ kaba ïa dei bad ka hok ban ïoh jinghikai ne pule puthi la kren da u Orius Syngkli, ïa ka jingtrei pyntrei ïa ki khynnah la kren da ka Queency Kharmawlong, ïa ka aiñ jingshongkurim khynnah da u Fast Lakupar Iawbor bad ïa ka jingai jingshakri lyngba ka aiñ ba khlem jingsiew la kren da ka Dashisha Myrthong.