Lashai 16 tarik ka jingïakhun phainal jong ka 3rd Division bad 2nd Division

Khliehriat, Nailur 15: Ka lympung ïalehkai phutbol jong ka kyrdan 1st Division bala pynïaid da ka East Jaiñtia Hills District Football Association (EJHDFA) kala sdang mynta ka sngi 15 tarik ha madan Artificial Turf, Diengshynrum, Khliehriat.
Ha ba phai sha ka jingïakhun kaba nyngkong ka Pamrakmai SCSC kala pynliem da 3-0 kol ïa ka Lumshken SC, ïa ki kol na ka Pamrakmai SCSC la thep da u Nirmal Dkhar haka minit ba 24 & 71 bad u Laphing Shylla haka minit ba 32.
Katba ha ka jingïakhun kaba ar kaba la long hapdeng ka Tpepswer SSWO pyrshah ïa ka Mukhaialong SCSC kila poi shaka jingïakhaid da mar shikol (1-1), ïa ka kol na ka Mukhaialong la thep da u Hamiaid Sana haka minit ba 37. Na ka liang ka Tpepswer SSWO la thep da u Chemi Suchiang haka minit ba 68.
La pyntip ba ka jingïakhun Phainal jong ka kyrdan 3rd Division kan long lashai ka sngi 16.10.2024 hapdeng ka Lumshnong YWSC bad ka Dkhiah West SC ha ka por 12 baje mynsngi. Katba ka jingïakhun Phainal jong ka kyrdan 2nd Division kan long hapdeng ka Sutnga Mission SSCC pyrshah ïa ka Musniang SC ha ka por 2 shiteng nohphai sngi.