Nongpoh, Risaw 14: Ki paidbah Karbi ha Ri Bhoi District ki la pynpaw ïa ka jingkmen bad ai khublei kyrpang ïa u Bah Mayral Born Syiem, MLA ka Nongpoh Constituency hadien ba kum u nongmihkhmat paidbah u la pynsngew bad ai jingmut sha ka Expert Committee jong ka State Reservation Policy ban pynheh ïaka bhah iohkam jong kiwei ki jaitbynriew ba dang sahdien kum ki Karbi bad kiwei kiwei.
Ha ka kyrwoh ba la phah sha ki lad pathai khubor, naka liang u Bah Diren Klein bad u Bah Komin Terang, ryngkat ki nongialam ka Marmain Area Youth Upliftment (MAYU), ki la pynpaw ïa ka jingsngewnguh kaba khraw ïa u Bah Mayral Born Syiem, MLA ka Nongpoh Constituency halor ar tylli ki bynta ba kongsan kaba u la ai jingmut sha ka Expert Committee na ka bynta ban pynheh ïa ka bhah ioh kam kiwei ki jaid bynriew rit paid kum ki Karbi, Rabha, Hajong bad kiwei kiwei ki jaid bynriew rit paid kata na ka 5% sha ka 10% bad kane ka jingai khublei ki paid Karbi ka dei ruh hadien ba u MLA ka Nongpoh haka 5 tarik Risaw u la leit ban ai jingmut sha ka Expert Committee halor ka bhah iohkam iohjam katkum ka State Reservation policy.
Kila pynpaw ruh lada ka bhah kam bhah jam ka long ïaryngkat dor, ki khun samla haka jylla kin kiew shaphrang namar ka jingthmu hi jong ka Reservation Policy ka long ban ai ka bhah ba kham kyrpang sha ki jaitbynriew ba dang sahdien ban ïakiew lang ha baroh ki liang, namar katkum ka kaiphod jong ka NITI AAYOG kala dei ka por ba ka sorkar kan pynthymmai ïaka rukom bhah kam khamtam naka bynta kito ki jaitbynriew rit paid kiba dang sahdien ban pynheh noh naka 5% sha ka 10% bad 15% namar ka long shisha ka jingeh ïaki khun samla naka jaitbynriew ba dang sahdien ba kin ioh lem ïaka kam sorkar lada ka sorkar kam don ka bhah kyrpang.
Shuh shuh ki paid Karbi kila ai ruh ka jingkyrshan halor ka jingai jingmut jong u MLA ka Nongpoh ha kaba ïadei bad ka District Selection Committee dei beit ban thung da ki trai district, namar ki samla naka district mynta kila lah ban trei ïa kitei ki kam katkum ka jingpule jong ki.
Namarkata kum ki paid Karbi ki kyrmen skhem ba katei ka jingai mut u MLA ka Nongpoh sha ka Expert Committee kan long ka jingmyntoi lang ïaki jaitbynriew ba dang sahdien haka district bad khmih lynti ruh ba ka Expert Committee kan pdiang ïa katei ka jingai jingmut jong u MLA naka bynta ka jingmyntoi lang haki liang baroh.
