Shillong, Risaw 13 : Ka Ambulance ka dei na bynta u duk u suk bad na bynta kiba don kam shisha ong u Bah Fineststar Kharkongor ha ka jingpyllait paidbah ïa ka ambulance jong ka Mylliem Welfare Youth Organisation na bynta ka thaiñ Mylliem ha ka jingïalang kaba long ha Mylliembah ha kane ka sngi Saitjaiñ.
Ïa kane ka ambulance la pynïoh na ka Chief Minister Development Scheme lyngba ka jingïarap jong u Bah Hamlet Dohling ba dei ruh u Chief Adviser jong u Myntri Rangbah.
Ha kane ka jingïalang u Bah Finest Kharkongor u la pynithuh ruh ïalade kum uwei na ki kyrtong ba pan tiket na ka NPP ha kane ka elekshon MDC.
“Shwa ba ngan jam sha ka kylli sainpyrthei nga la don bynta ruh kum u Nongïalam KSU Upper Shillong bad ruh kum u Secretary ka Mylliem Sports Club kumjuh ha ka imlang sahlang,” ong une u samla haba kren ha ka jingïalang.
Shuh shuh u la pynpaw ruh ba mynta ka kynti u thrang ban ïoh ïa ka jingkyrshan jong ki paidbah khnang ba un lah ban ai shuh shuh ka jingshakri kaba kham paka bad janai ïa ki paidbah ka constituency.
La donlang ruh ha kane ka sngi naduh u Secretary ka Raid Mylliem u Bah MB Kharlukhi kum u Symbud Kongsan, Myntri C Kharkongor, ki nongïalam shnong, Bah Fredrick Lyngshiang na ka NPP bad ruh ki nongkitkam jong ka Mylliem Welfare Youth Organisation bad kiwei kiwei.
Ïa kane ka ambulance u Kongsan bad Symbud Kongsan ki la aiti sha ka Mylliem Welfare Youth Organisation ban peit bad pynïaid.
Ha kane kajuh ka sngi u Bah MB Kharlukhi u la aiti ruh ïa ka song pisa sha ki nongïalam ka MWYO khnang ba kin lah ban pyndonkam ïa ka na ka bynta ki jingdonkam ba hakhmat eh kum ka bai umphniang bad kiwei kiwei.
Na ka liang u Kongsan u la ai khublei ïa u MLA barim, uba wat hadien ba la shah rem ha ka elekshon ba la dep ruh hynrei u dang ïai bteng ban ïarap na ka bynta ka bit ka biang ki paidbah nongshong shnong ka constituency.
