Nongpoh, Jylliew 04: U Nongïalam ka Congress ba dei ruh u Myntri barim ka sorkar jylla, Bah Ronnie V Lyngdoh ha ka sngi Saitjaiñ u la pynpaw ba ka Congress ka don ka jingkyrmen ba kan kiew biang arted ha ka elekshon MLA kaban long ha u 2023.
“Nga da sngewskhem bad sngew tikna ba ki paidbah ka Jylla kin jied biang ïa ka Congress ha u 2023. Kane kam dei tang ka jingïohi jongnga hynrei kadei ka jingthrang jong ki paidbah ka jylla,” ong u Bah Ronnie uba dei ruh ha kajuh ka por u MDC ka Mylliem haba kren bad ki lad pathai khubor hadien ba la wai ka prokram ha Mylliem.
Katkum ka jingong jong u, ki paidbah kynthup naduh ki samla ki kham don ka jingshaniah ha ka Congress namar ki ïohi ba dei tang katei ka party mynta kaba don ïa ki mat treikam kiba shai bad kiba long salonsar ha ka roi ka par ha ki liang baroh ha ka jylla.
Katkum ka jingong jong u, ki paidbah ki la ngiah shoiñ ïa ka rukom synshar jong ka sorkar MDA bad kumno mynta ki kwah ban ïoh noh ïa ka jingkylla.
“Ha kine ki saw snem tam, ka jylla ka la shah lyngshop da kiba bun ki jingeh kynthup naduh ki lad ïohkam ïohjam, ka koit ka khiah bad ruh ha ki kam pynroi kiba paw baroh ba ki biang tang ha ki kot khubor bad ki social media hynrei ha ki paidbah kam don ei ei satia.
Shuh shuh u ong ruh ba kum u nongïalam Congress, u kwah ban ieng ïakhun ban pyntikna ba lada ka don kano kano ka jingkylla kan ym dei satia kaba sniew hynrei ba kan long ka jingïada ïa ki paidbah khamtam ïa ki trai ri trai muluk. “Nga ngeit ruh ba dei tang ka Congress kaba lah ban ai ka jingsngewshngaiñ ïa ki nongshong shnong ka jylla.”
Shuh shuh haba kren halor ka jingkhyllem jong ka dome jong ka Iing Dorbar Thawaiñ ka jylla, u Bah Ronnie u la ong ba katei ka dei ka dak kaba paw halor ka rukom treikam bym hok. Nalorkata, u ong ruh ba naduh ki surok kiba dang shu dep shna ruh ki la pra lut kynthup naduh ka jaka pynieng bor ba latip kum ka Inter State Bus Terminus kaba dang shu dep plie dang shen.
“Kane kadei ka jingkyrsiew ïa ki paidbah ka jylla ba kane kadei ka dor kaba phi siew lada phi die noh ïa ka vote jong phi. Kine ki dei ki jingjia kiban pynkyndit ïaphi bad kumno ba ngi donkam ban ïakhun bad rat dyngkhong ïa ka bamsap khnang ba ki kam pynroi kiba tikna kin wan bad ba ka jylla kan kiew arted,” u la bynrap shuh shuh.
