Nongpoh, Jylliew 04: Ban kynmaw burom ïa ka jingïaid lynti ka Ri Bhoi District ba la dap 30 snem kynthih naduh ba la ioh la ka jong ka District ba pura ha ka 4 tarik u Jylliew 1992, ka Ri Bhoi Dorbar ryngkat ka jingïatrei lang bad ka ophis u Deputy Commissioner ka Ri Bhoi mynta ka sngi ki la pynlong ïa ka jingrakhe kaba kyrpang ïa kane ka sngi khraw jong ki paidbah ha Ri Bhoi ba kum ki paidbah ki la ioh la ka jong ka District ba pura.
Ïa kane ka jingrakhe la pynlong ha District Library Auditorium Hall, Nongpoh, ha kaba u MLA ka Nongpoh, u Bah Mayral Born Syiem u la wan ban shim bynta kum u kongsan ban pynphuh pynphieng ïa kane ka sngi kyrpang ba la tip kum a Ri Bhoi Day lane kata ka sngi ba ki paidbah ki la ioh la ka jong ka District ba pura.
Ha kane ka jingrakhe la wan shim bynta ruh ki MDC ka Ri Bhoi ba kynthup ïa u Bah Balajied Rani, MDC ka Nongpoh, u Bah Charles Marngar, MDC ka Mawhati, u Deputy Commissioner, u Arpirt Upadhyaya, u SP ka Ri Bhoi, u Giri Prasad, u Bah R.R Kynsai Makdoh, nongaibuit ka Ri Bhoi Dorbar, u Bah Bipul Thangkhiew, president ka RBYF, u Bah B.B Makdoh, President ka Synjuk ki Rangbah Shnong Ri Bhoi District, u Bah R.B Shadap, President ka Ri Bhoi Dorbar bad kynthup naduh ki ophisar, ki riew rangbah bad ki khun samla ka dong Ri Bhoi.
Ha kane ka sngi la pynsngew ruh ïa ka jingkren jong u Dr. D.D Lapang lyngba ki kor ki bor ka juk ba mynta uba la ai ka jingkren shaphang ka jingïaid lynti jong ka Ri Bhoi naduh ba la ioh ïa ka district ba pura ha ka 4 tarik u Jylliew, 1992 ha kaba ma u ruh u la long uwei na u nongïalam uba la don bynta ban pynioh ïa kane ka District ba pura ha Ri Bhoi.
Ka Ri Bhoi Dorbar kum ka jingburom bad ka jingpynshlur ruh ïa ki rangïalehkai sport bapher bapher kiba la wan rah ïa ka nam jop ha ka Meghalaya Game kaba dang shu dep shen ha Nongbah Shillong ka la ai ïa ki khunsam lyngba ki syrnot bad kumjuh ruh ka la ai khusnam sha kito ki nongjop ha ka Ri Bhoi Day Run ba la pynlong shi bynta ka jingrakhe ïa ka jingdap 30 snem ka jingïaid lynti ka Ri Bhoi District naduh ba la ioh la ka jong ka District ba pura.
Nalor u MLA ka Nongpoh, u Bah Mayral Born Syiem, uba la ai jingkren ha kane ka sngi kum u kongsan bad kiwei kiwei kiba la ai jingkren naduh u MDC ka Nongpoh, u Bah Balajied Rani, u MDC ka Mawhati, u Bah Charles Marngar, u deputy Commissioner, u Arpirt Upadhaya, u SP ka Ri Bhoi, u Giri Prasad bad kiwei ki la pynpaw ka jingkmen ba ka Ri Bhoi Dorbar ryngkat ka bor synshar District ki la lah ban pynlong ïa kane ka jingrakhe ka jingïaid lynti ba 30 snem naduh ba ka Ri Bhoi ka la ioh la ka jong ka District ba pura.
Ka sur kaba mih na kitei ki nongïalam ka long ka jingai burom ïa ki nongïalam kiba la don bynta ha kaba pynioh ïa ka District naduh u Dr. D.D Lapang, u Bah J.D Rymbai, u Fr. Sylvanus Sngi Lyngdoh, u Bah Fleming Lapang bad kiwei kiwei ki nongïalam ba dei lyngba ka jingioh jngai jongki bad ka jingdon jongki ïa ka jingkitkhlieh ki paidbah ka Ri Bhoi ki la ioh la ka jong ka District ba pura ba ka Ri Bhoi ka la dang kiew shaphrang ha baroh ki liang.
Ki la pynpaw ruh ba kane ka jingïaid lynti ba la 30 snem naduh ba la ioh la ka jong ka District kam pat kut satia , hynrei dang don shibun ki bynta ba kum ki paidbah ka Ri Bhoi ki hap ban ai ka jingïatrei lang ha baroh ki liang khnang ba ka Ri Bhoi kan dang kiew shaphrang ha ki kam pynroi bad ban dang wan shuh shuh ki jingkyllla kiba ai jingmyntoi shisha na ka bynta ki paidbah ka Ri Bhoi.
