Shillong, Risaw 11: Ka jingrakhe ïa ka Durga Puja, kaba la tip ruh kum ka Durgotsava ne Shaaradotsava, ka dei ka tamasa kaba la sdang nyngkong eh ha India kadei kaba la leh burom bad ka jingmane ïa ka blei ki riewngeit Hindu ka Durga, la rakhe kum ka dak ka jingjop ka Durga ïa u Mahishasura.
Ïa kane ka jingrakhe kaba la leh ha baroh kawei ka ri da ki riewngeit Hindu, la rakhe ruh da kaba kyrpang hapoh jylla Meghalaya ha kaba bun bah ki riewngeit Hindu ki la ïamih ryntih naduh dangstep ban shim bynta ha kane ka jingrakhe ïa kane ka Tamasa.
Baroh ki Pandal Puja kiba don ha Nongbah Shillong ki la dap da ki riewngeit Hindu ban rakhe ïa ka jingjop jong ka blei Durga ha ki jingïakhun thma jong ka pyrshah ïa u asura, Mahishasura. La ong ba kane ka jingrakhe kadei ruh ka tamasa jong ka jingjop ka jingbha pyrshah ïa ka jingsniew, watla ka dei ruh ka jingrakhe kum ka sngi ka jong ka blei kum ka kmie jong baroh ki jait jingim bad ki jingthaw, la don ruh ki jingshad dandiya bad kiwei ruh ki jinglehkmen bad ka jingïabam sngewbha ha ki jaka ba la pynïeng ïa ki pandal.
La ïohi ruh ba kat shaba la buh ïa ki Pandal ki la dap smam da ki riewngeit Hindu kiba la wan ruh lyngba ki riam bapher bapher. Ha kane ka sngi sdang jong ka lehniam Durga Puja ka jingpynriam ïa ki pandal ki la long ha ki rukom bapher bapher bad kiba la pynpur ruh da ki light kiba itynnad kiba la pynkhreh da ki puja Pandal committee bapher bapher ha la ki jong ki jong ki jaka, khamtam ha ki thaiñ Jailroad bad Khyndailad nalor kiba la buh sha kiwei ruh ki district ban rakhe ïa kane ka tamasa.
