Shillong, Risaw 11: Kum ka dak jong ka jingrakhe ïa ka World Mental Health Day, la pynlong ïa ka State-level workshop ha kaba ïa kane ka prokram la pynlong da ka Department of Psychiatry and Continuing Nursing Education (CNE) Cell NEIGRIHMS ban pynsngewthuh ïa ki paidbah halor ka jingmut jingpyrkhat kaba koit ba khiah. Ka phang jong kane ka workshop ka dei “It is Time to Prioritize Mental Health in the workplace”, ha kaba palat 600 ngut ki nursing officer na kylleng ka jylla ki la shim bynta ha kane ka workshop.
Ha kane ka workshop kaba la thmu ban ïarap bad ban pynlong ïa ka jingmut jingpyrkhat kaba koit ba khiah ha ki jaka trei, la batai ruh halor ka jingdonkam ban buh hakhmat ïa ka jingkyntiew bad ban ïada ïa ka jingmut jingpyrkhat ne ka bor pyrkhat. Ha kane ka prokram u Prof. (Dr.) Nalin Mehta, Director, NEIGRIHMS u la long u kongsan bad Prof. (Dr.) C. Daniala, Medical Superintendent kum symbud kongsan.
Na ka liang kine ki heh ki haiñ ki la banjur halor ka jingdonkam ban ïoh ïa ka bor pyrkhat kaba koit ba khiah ha ki jaka trei. Katba na ka liang u Prof. (Dr.) Nalin Mehta u la kren shaphang ka jingktah ha ka imlang sahlang wat haduh kine ki sngi kaba long ruh kum ka jingpang, bad u la kyrpad ïa kiba ïashim bynta ban shim khia bha ban sumar ïalade bad kumjuh ruh ban wad ki lad jingïarap.
U la banjur ruh halor ka jingdonkam ban ithuh ïa ki dak ki shin jong ka jingpang ka bor pyrkhat ha ka por kaba biang khnang ban ïoh ki lad jingïada. U la banjur halor ka jingdonkam ban ïatreilang ha ki jaka trei bad ban pynthikna ïa ka bha ka miat jong baroh ki nongtrei.
Katba Prof. (Dr.) C. Daniala la banjur ïa ka jingdonkam ki lad ai jingkyrshan ba kin don ha baroh ki jait seng ha kaba kan don ka sawdong sawkun kaba bha na ka bynta jong iwei pa iwei. La ong ba kane ka workshop ka la long kaba jop bad kaba seisoh ha kaba ki la don bun ki jingkren napoh ka Department of Psychiatry and Continuing Nursing Education cell.
