Shimbynta kiba buh ki shnong ha ka jingrakhe ‘World Environment Day’ha West Jaintia Hills

Jowai, Jylliew 04: Shi bynta ban rakhe ïa ka sngi pynneh pynsah mariang ne ka World Environment Day, ha West Jaiñtia la rakhe ïa ka mynta ka sngi ha kiba bun ki shnong bad kumjuh ruh na ki bor sorkar ka District kila pynlong ïa ki jingïakop bapher bapher jong ki khynnah skul, jingpynkhuid Shnong bad ka jingthung ïa ki tynrai dieng.
Na ka liang ka Meghalaya Basin Management Agency (MBMA) bad ka Meghalaya Basin Development Authority (MBDA) West Jaiñtia Hills mynta ka sngi kala rakhe ïa kane ka taïew da kaba pynlong ka jingthungdieng ha DC Quarter, ha ophis Municipal, ha North East Adventist University bad ha BDO Thadlaskeiñ ophis.
La don ruh ka jingïakop dro dur, ka jingthoh Essay bad ïa kane ka jingrakhe yn pynkut haka 6 tarik (Monday) ha Mission Compound Community Hall, Jowai bad yn don ki jingïakop bapher bapher ka jingsam khusnam bad kiwei de.
Ha Ïalong ka Voluntary organization (VO) jong ka shnong Ïalong kaba kynthup ïaki 29 ki Self Help Group (SHG) kiba don hapoh kane ka shnong kila rakhe ïa ka ‘World Environment Day’ da kaba pynkhuid ïa ki lynti ki syngkieng jong ka shnong.
Haba kren lamkhmat ha ka jingïalang plie ïa kane ka jingpynkhuid shnong, ka kong Sngi Dkhar kaba long ka President jong kane ka VO kala ong ba ha ki snem kiba la lah ruh ka VO ka ju pyndonburom ïa kane ka sngi da kaba thung dieng hapoh ka shnong, hynrei ha kane ka kynti kila rai ban pynlong da ka jingpynkhuid shnong.
Ka Rita Phawa kaba long ka Secretary jong ka VO haka shnong Ïalong haka jingkren pdiang sngewbha jong ka, kala ong ba ka VO kala ju pynlong hi ïa ki prokram pynkhuid shnong mynshuwa ruh bad ka kyntu ïa ki kynthei ba kin ïatrei khambha namar kane ka sngi ka long kaba kyrpang.
Na ka liang u kongsan kongsan haba ai jingkren ha kane ka sngi u Dr H.H. Mohrmen ula pynkynmaw ba ka jingpyndonburom ïa ka WED kaba la sdang haka snem 1972 kala dap 50 snem mynta u snem. Wat la sanphew tylli ki snem kila ïaid ruh hynre ka jingdawa ban pynneh pynsah ïa ka mariang ka dang neh hi kumjuh.
U kyntu ïa ki SHG ba kin long kiba ïatylli, kiba skhem jingmut bad khamtam kiba shai ha ki jingkheñ jingdiah khnang ba ki seng jong ki, kin ïaid shakhmat bad nangroi.
Hadieng jong ka jingïalang plie ïa kane ka jinglehkmen WED, ki kynthei kila ïa mih paidbah bad pynkhuid ïa ka shnong da kaba sdang naka ïngdorbar jong ka shnong hi. Nalor ki dkhot jong ki SHG ki don ruh ki dkhot jong ki Producer Groups (PG) kiba la wan ban ïashim bynta ha kane ka jingpynkhuid shnong.
Na ka liang ka tnad pulit ha Jowai kila pynlong ïa ka jingthung tynrai dieng ha Police Reserve Jowai ba la shim bynta lang da ki khynnah skul bad ki nonghikai jong Police Public Secondary School bad la sam ruh ïa ki Certificate sha ki khynnah skul kiba jop ha ka jingïakop thoh Essay, jingkyntip, bad Extermpore Speech.
Ka Seng Samla Dorbar shnong Khimusniang, Jowai ruh ka la shim bynta lang ïa kane ka jingrakhe da kaba pynlong ïa ka jingthung ïa ki tynrai dieng kiba la don haduh 105 tylli ha shilynter jong ki rud surok jong ka shnong, kiwei de ki shnong kum ka Nangdong-B kila pynlong ïa kane ka juh ka jingpynkhuid shnong bad thung tynrai dieng lem bad kiwei kiwei de.