Shillong, Risaw 10: Ka 7 Wasa United bad ka Shillong Lajong FC kin ïakynduh pyrshah ha ka jingïalehkai ba nyngkong jong ka 4th Meghalaya State League 2024 haWahiajer Multi Sports Complex ha ka 26 tarik Risaw, katkum ka prokram ba la pyllait da ka Meghalaya Football Association ha ka sngi Palei (10 tarik Risaw, 2024).
Baroh ar tylli ki kynhun ki la shah thup ha ka Group E, ki ban pyndep ïa ki jingïalehkai jong ki ha madan phutbol kaba ha West Jaintia Hills. Haba phaidien, ka 7 Wasa ka la ïohrah ïa ka MSL (sien ba nyngkong ba la pynlong) ha u Kyllalyngkot snem 2018, katba ka Lajong ka la rah ha u snem ba bud, kata ha u Nohprah, 2019.
Kiwei pat ki Group kin ïakhun ïa ka jingïalehkai kaba nyngkong ha ka 28 tarik Risaw laitnoh ka Group C ha Tyrsad, ha kaba ki jingïalehkai yn sdang naduh ka 30 tarik u Risaw. Ka jingïalehkai ba khadduh na ki Group kan long ha ka 7 tarik Naiwieng.
Baroh ki don haduh hynriew tylli ki Group, ha kaba kawei pa kawei ka kynthup ïa saw tylli ki klob, bad barohlang ki long haduh 24 tylli ki kynhun ba ïashimbynta, kiba dei ki kynhun ba ha khliehduh na ki league ba la pynlong da ki seng distrik ba ïasoh bad ka MFA.
Ki kynhun lahduh jong ki Group kynthup bad ar tylli ki kynhun ba kynsai ba bat ïa ka kyrdan ba ar na kine ki hynriew tylli ki Group kin jam sha ka wat ïakhun Quarterfinal. Kane ka pynpaw ruh ïa ka jingkylla haba nujor ïa ki lai snem ba ladep, ha kaba ki lahduh jong ki Group ki la ïoh rung beit sha ka semifinal, hynrei mynta la ïoh ban wanrah sa kawei pat ka wat ïakhun ka ban pynitynnat shuh ïa ka lympung.
Ka tarik bad ka jaka ban pynlong ïa ka wat ïakhun knockout yn sa pyntip da ka MFA hadien.
Lah ban kdew ba mynta ka kynti, ka Rangdajied United FC ka dei ka kynhun lahduh ban ïada ïa ka burom, hadien ba ka la pynliem ïa ka Khliehmawlieh Youth Club ha ka jingïakhun final jong u snem ba ladep.
