Shillong, Risaw 08: U Myntri Rangbah ka Jylla Conrad K Sangma ha ka sngi Ba-ar ula leit jurip ïa ki jaka ba shlei um bad ba twa khyndew ha West Garo Hills District bad ïakynduh ruh ïa ki lanot ha ki jaka sah ba shipor bad ki shnong bad nalor ka jingsam ïa ki song jingïarap pisa sha ki bahaïing jong ki briew ba ïap ha kane ka jinglynshop ki bor ka mariang.
Ka Ri-lum Garo ka la shah lynshop ha ka jingther u slap, uba wanrah ïa ka jingshlei um ba shyrkhei bad ruh ki jingkhynra khyndew ha kine ki 4 sngi ba la leit noh, kaba sdang naduh ka sngi Palei jong ka taïew ba la lah dep. Ka jingshlei um bad jingtwa khyndew ka la shim haduh 17 ngut ki mynsiem briew ha ki 4 tylli ki District.
Haduh 7 ngut ki briew na kajuh ka longïing, kila ïap na ka jingshah tep im ha ka khyndew ba twa ha South Garo Hills, 5 ngut ha West Garo Hills, 3 ngut ha East Garo Hills bad 2 ngut ha North Garo Hills.
Ha kaba ïadei bad kane haba leit ban ai ki jingïarap sha ki lanot, u Myntri Rangbah dalade ula leit ïakynduh ïa ki lanot bad ula aiti ïa ka song jingïarap pisa ba mar T.4 lak sha iwei pa iwei na kiba khlad.
La ong ba ha Rongkhon Songgital, ula aiti ïa ka jingïarap pisa ba T. 8 lak sha ka kurim u (L) Bijoy Marak, u nonghikai uba shah rong umsaw bad u khun ba 13 snem Wian Chigado R Marak ha ka janmiet sngi Thohdieng.
La ong ba u Myntri Rangbah ula ïakynduh ruh ïa ki bahaïing jong ka Sarika M Marak ba 18 snem, kaba la ïap na ka jingtwa khyndew ha ka shnong Karonggre, West Garo Hills bad aiti ïa ka song jingïarap ba T. 4 lak.
Hadien kane, ula leit ban ïakynduh ïa ki Kmie Kpa jong u heprit Miando P Marak ba 5 snem ka rta, bad aiti ïa ka song pisa ba T.4 lak. U Miado ula ïap na ka jingshah ban ha ka khyndew kaba twa katba u dang ïalehkai sha kyrpong ïing ha Sorokpara, kaba hab ha Dalu, West Garo Hills ha ka sngi Thohdieng.
Na ka liang u Myntri Rangbah u la leit ruh ban ïakynduh ïa ki bahaïing u Tengseng R Marak ba 28 snem ha Tibapara, kaba hab ha Dalu, uba la khlad na ka jingkhyllem u dieng halor ka kali ha Songsak, East Garo Hills ha ka miet sngi Saitjaiñ. Ula aiti ïa ka song pisa ba T.4 lak sha ki bahaïing jong une u lanot uba la ngat ha kane ka jingjia.
Nalor kane, ula leit ruh ban ïakynduh ïa ki bahaïing ka Santa Marak kaba shah tep im ha ka khyndew ba twa ha Koinabhui, kaba hab ha Dalu ha ka sngi Thohdieng. Ula aiti ïa ka song jingïarap ba T.4 lak.
Shuh shuh u Myntri Rangbah ula leit peit ruh ïa kylleng ki jaka ban peit ïa ki jingpynjulor jong ka mariang bad ïakynduh ïa ki nongshong shnong ba shah ktah ha kane ka jingjia ba sngewsih.
Hadien kane, ula pynlong ïa ka jingïalang bishar kam bad ki Bor District ka West Garo Hills bad ki Ophisar ka MSDMA ban lum jingkheiñ ïa ki jingpynjulor ka jingshlei um bad jingtwa khyndew ha Dalu C&RD Block bad ban peit ruh ïa ka jingïaid ki lad ai jingïarap sha ki lanot.
Katba ha Dalu C&RD Block, ki bor ka mariang ki la ktah haduh 2630 tylli ki longïing bad ki bor District ki la buh haduh 68 tylli ki jaka ai jingïarap bad sam ruh ïa ka bam ka dih sha ki 17000 ngut ki lanot ba shah ktah ha kane ka jingjia twa khyndew bad shlei um.
Ha ka jingïalang, u Conrad ula bthah ïa ki ophisar ban pynlong ïa ka jingwadbniah ïa ki Wah bad ki jaka kiba don jingma na ka jingshlei um nalor ban shim ïa ki sienjam ha ka ban leh eiei ban lah kiar ïa ki jingpynjulor hadien habud.
Ula bthah ruh ban maramot noh mardor ïa ki surok bad ki jingkieng hapoh ka Block bad ban pynthikna ha ka ban pynpoi ïa ki marbam sha ki shnong kiba shah ktah kham kloi katba lah.
