Mawkyrwat, Risaw 08: Ka Synjuk Ki Seng Samla Shnong (SSSS), Hynñiewtrep Youth Council (HYC), bad ka Hynñiewtrep Integrated Teritorial Organisation (HITO) jong ka South West Khasi Hills District, ha ka 7 tarik u Risaw, 2024 ki la leit ban ïa kynduh ïa u Deputy Commissioner ka South West Khasi Hills District ban ïa kren halor ki lai tylli ki mat ba kongsan.
Ki mat ba kongsan ba ki lai tylli ki kynhun ki la leit ban ïa kynduh ki long halor ka jinglongryntieh ne Decipline ha kiei kiei baroh ba kum ki nongtrei ha ki ophis ki dei ban leh khnang ba kan nym ktah ïa ki paidbah nongwan donkam.
Kawei pat ka long ban don noh ïa ka jaka buh snam ne ka Blood Bank hapoh Civil Hospital, Mawkyrwat khnang ba kan long ka jingïarap na ka bynta ki nongpang kiba donkam kyrkieh ïa ka snam bad ka mat ba khadduh ka long ka jingthungkam thung-jam lyngba ka District Selection Committee (DSC) ha kaba ïa kane ka bynta, ki la don shibun ki jingïatyngkhuh halor ki jingdkoh jong kane ka kam ha kine ki por ba la dep, khamtam ha ka rukom thungkam kaba dang shu dep ha u ‘Naitung, 2024.
Ïa ka kynhun la lamkhmat da u bah Wallam Syiemiomg uba dei u Chairman jong ka Synjuk Ki Seng Samla Shnong (SSSS), South West Khasi Hills District ha ryngkat ki President bad Secretary jong ki ar tylli ki Sengbhalang.
Kumta halor kitei ba kongsan na ka liang u Deputy Commissioner ka South West Khasi Hills District ula kular hakhmat jong ki ba un sa shimkhia bad leh ïa kaba donkam khnang ba kan long ka jingïarap na ka bynta ki paidbah ba bun balang.
