Jowai, Risaw 07: Ka Nangbah Dukhu ka la ïoh ban buh jaka ïalade ha ka final jong ka lympung “7th U Debo Shullai Memorial Trophy” jong ka kyrdan 2nd Division Football Tournament 2024 bala pynïaid daka West Jaiñtia District Sports Association (WJDSA) Jowai hadien ba jop ïa ka semi final ba la long ha ka 07 tarik u Risaw, ha Kiang Nangbah Stadium, Jowai.
Ka Nangbah Dukhu kala pynliem da 2-1 kol ïa ka Panaliar. Na ka Nangbah Dukhu la thep da u Shanlang Thubru (72’) bad u Thuara Nampui (74’). Katba ïa ka shikol na ka Panaliar la thep da u Sam o wan Sumer (80+7).
Ka Semi Final kaba ar kan long mynta ka sngi (8.10.2024), hapdeng ka Lion S.Y.A pyrshah ïaka Lumbhahdakha haka por 2 baje noh phai sngi.
